13 Kamena : Mutagatifu Antoni wa Paduwa (1195-1231)

Umuhanga mu nyigisho za Kiliziya. Antoni wa Paduwa yavukiye i Lizibone muri Porutugali mu w’1195. Se yagiraga icyo apfana na Godifiridi wa Buyo (Bouillon) wacunguye Yeruzalemu akayibera umwami wa mbere abakristu bamaze kuyirukanamo abayisilamu. Ababyeyi ba Antoni bari barimukiye ariko muri Porutugali. Aho Antoni agiriye imyaka 15 yihaye Imana mu bamonaki ba mutagatifu Agusitini. Rimwe misa iba ari we urinze abarwayi, igihe cya Konsekarasiyo arapfukama asenga Isakaramentu aho yari ari, nuko yumva yifuza guhanga amaso cyane Ukarisitiya. Ako kanya, inkuta za kiliziya yaberagamo misa zisa n’izicitsemo icyuho, abona neza neza umusaseridoti yerekana ukarisitiya. Aramya Isakaramentu asa “n’ uwabonekewe’’. Hashize iminsi ahura n’abafaransisikani bajyaga mu bihugu bya Misiyoni muri Afurika kwigishayo ukwemera gutagatifu. Kuva ubwo na we atangira kwifuza kuba umufaransisikani. Aho abo basaseridoti bamariye gupfira Imana aho bari bagiye kwigisha, imirambo yabo bakayigarura muri Monasiteri yari arimo, mutagatifu Antoni kuva icyo gihe yiyemeza bidasubirwaho kwinjira mu bafaransisikani, kuko ari ho yabonaga yazagira amahirwe yo koherezwa mu bihugu bya Misiyoni, Imana yabishaka akazayibera umumaritiri. Ahaguruka ubwo ajya mu Butaliyani, ahagera Mutagatifu Faransisiko ataritaba Imana. Babanza kumuha umurimo wo gutekera abandi bamonaki.Nuko umunsi umwe bamuhamaga kwigisha bagenzi be atabyiteguye. Araza atangira mu magambo adashamaje ariko meza nyuma akomeza mu nyigisho zihanitse mu bwenge, mu buhanga no mu mvugo nziza kandi zinyuze imitima, atangaza bitavugwa abamwumvaga bose. Yasaga n ‘aho ari Roho Mutagatifu ubwe wamuvugiragamo. Kuva ubwo bamuha kwigisha no muri Kaminuza za Mompeliye, Tuluzi, Bolonye na Paduwa. Ubwo kandi niko akora ibitangaza byinshi. Nuko ahindura abantu benshi batabarika cyane cyane mu bakristu b ‘abahakanyi no mu bigishabinyoma, bituma bamwita  “inyundo ibasha abanyabinyoma’’. mu bitangaza byinshi yakoze, bimwe ni ibi: se yari yarasigaye muri Portugali. Aregwa ko yishe umuntu bamubeshyera kandi acirwa urubanza rwo kwicwa. Antoni abimenye asaba Imana, imuha gusubira muri Porutugali nk ‘aho tuvugiye aha, Roho w ‘Imana amutwara yo, azura uwo bavugaga ko se yishe ngo avuge ubwe uwamwishe. Uwo mugabo araza ashimangira ko atari se wa Antoni wamwishe. Nuko ako kanya Imana isubiza Antoni muri monasiteri yinjirana n ‘abandi gusenga nk ‘utigeze agira aho ajya. Ubundi yari ku nkombe y ‘inyanja yigisha. Abahakanyi benshi bari aho bipfuka mu matwi banga kumva inyigisho ze. Nuko ifi ishyano ryose zihubuka mu nyanja ziraza  zidendeza imbere ye zimutega amatwi. Arangije kwigisha zirunama, aziha umugisha, zibona gusubira.

Iteka bamushushanya ahagatiye umwana Yezu, kuko, igihe kimwe mu ijoro, umwana Yezu yigeze kumubonekera akamumanukira mu maboko, bakaganira. Byongeye, abakristu bakunda kwambaza Mutagatifu Antoni kugira ngo abafashe kubona ibintu babuze, kuko umunsi umwe yigeze gutoragura mu buvumo bwari hafi ya Brive-la-Gaillarde ibitabo by’agaciro byari byibwe.  Yari azi kwigisha rwose. Igihe cyarageze, imbaraga zirashira acika intege bitewe n’umuhate yari afite mu kwamamaza Inkuru nziza. Igihe yari agiye gupfa, yasabye isakaramentu ry ‘Ukarisitiya. Amaze guhabwa Yezu, aravuga ati;  “Ndabona Imana yanjye’’, iri kumpamagara ngo nyisange’’. nuko apfa ku wa gatanu tariki 13 Kamena 1231 umugoroba ugiye kuza. Ni Papa Gerigori wa IX wamwanditse mu gitabo cy ‘abatagatifu mu mwaka w’1232. Papa Piyo wa XII amwandika mu gitabo cy’abarimu ba Kiliziya mu mwaka w’1946. twizihiza mutagatifu Antoni wa Paduwa ku itariki 13 Kamena.

 

Mutagatifu Antoni wa Paduwa udusabire

 

Leave a Reply

Your email address will not be published. Required fields are marked *