Uruhare rw’Abalayiki mu buyobozi bwa Kiliziya, icungamutungo, umwaka mutagatifu wa 2025 : Umunsi wa kabiri w’inama y’Abakaridinali i Roma

Kuri uyu munsi wa kabiri inama y’Abakaridinali iyobowe na Nyirubutungane Papa Fransisiko yakomeje imirimo yayo. Ku murongo wibyigwa hariho  amahugurwa y’abafite ubutumwa muri Kiliziya, ubuzima nyobokamana bw’ubuyobozi bukuru bwa Kiliziya ndetse n’ uruhare rw’Abalayiki mu buyobozi bwa Kiliziya.

Uruhare rw’Abalayiki mu buyobozi bukuru bwa Kiliziya ni imwe mu ngingo z’ibanze zagarutsweho mu nama y’Abakaridinali iri gusesengura inyndiko ya Papa “Praedicate Evangelium”. Iyi ni ingingo ya 10 muzikubiye muri iyi nyandiko “Praedicate Evangelium”: “Buri mukristu, hashingiwe kuri batisimu yahawe ni umwigishwa n’umwogezabutumwa mu rugero yahuyemo n’urukundo rw’Imana muri Yezu Kristu.Icyo ntigikwiye kwirengagizwa mukuvugurura ubuyobozi bwa Kiliziya. aho iryo vugurura rigomba no kutibagirwa uruhare rw’Abalayiki mu buyobozi bwa Kiliziya”. Ibi kandi birashingira kukuba hari inzego z’ubuyobozi muri Kiliziya  Abalayiki baba bafitemo ubushobozi n’ ubunararibonye kandi izo nzego zikaba zireba ibyo Abalayiki babamo buri munsi. Aha twavuga nk’urwego rushinzwe Abalayiki (Dicastère pour les laïcs), urwego rushinzwe kwita k’Umuryango no kurengera ubuzima (Dicastère pour la famille et la vie). Gusa ibi ntibikuraho inshingano za padiri cyangwa umwepiskopi.

Nyuma ya saa sita Abakaridinali bayobowe na Papa baganiriye ku mwaka mutagatifu wa 2025 wahariwe insanganyamatsiko:”Ukwizera”. Abakaridinali banagarutse kugukorera mu mucyo mubijyanye n’icungamutungo, kugenderahamwe, kuvugurura inzego mu buyobozi bukuru bwa Kiliziya, n’iyogezabutumwa muri iki gihe cyacu.

Iyi nama y’Abakaridinali y’iminsi ibiri yashojwe n’Igitambo cy’Ukaristiya cyayobowe na Nyirubutungane Papa Fransisiko ari kumwe n’abakaridinali bashya ndetse n’abakaridinali bose ba Kiliziya Gatolika. Mu nyigisho yatanze agendeye ku masomo matagatifu, Papa Fransisiko yagarutse kugutangara kwa Pawulo imbere y’umugambi w’Imana mu mateka y’Ugucungurwa kwa muntu, n’ugutangara kw’Abigishwa igihe bahuye na Yezu wazutse ubohereza mu butumwa. Ibi Papa yabigarutseho agira ngo Abakaridinali bitabiriye inama  bayisoze bashobora kubwira abantu bose Ibitangaza bya Nyagasani.  Papa yagize ati: “nkuko dutangara iyo tureba ibiri mu isanzure byose byaremwe n’Imana,  ni nako dutangara iyo dutekereje ku Mateka y’Ugucungurwa kwa muntu agira icyerekezo n’iherezo muri Kristu. Muri Kristu, twahawe umugisha mbere y’iremwa; muri We, twarahamagawe; muri We, twaracunguwe; muri We, ibyaremwe byose byagaruwe mu bumwe kandi twese, yaba abari hafi cyangwa abari kure, muri Roho Mutagatifu tuzasangira ikuzo ry’Imana. Uko gutangara imbere y’umugambi w’Imana  ni inzira y’umukiro. Aha ni ho Papa yahereye yifuriza Abakaridinali bashya ko Imana yahoza mu mitima yabo uko gutangarira umugambi wayo kuko bibarinda kugwa mu gishuko cyo kumva ko bashoboye ubutumwa bahamagarirwa ahubwo ko Imana ariyo ibashoboza. Papa yabifurije kutagwa mu gishuko cyo kumva ko bari hejuru muri Kiliziya ngo bibaviremo  kugwa mu mitego  Sekibi ari gukoresha ngo ahindure  Abigishwa ba Kristu ab’isi.  

Papa yasoje abwira Abakaridinali ko bagomba guhora barangwa n’ishyaka ryo kwamamaza Inkuru Nziza nkiryaranze Pawulo Mutagatifu kandi bagahora bahangayikiye ubushyo Imana yabaragije.

 

Umwanditsi

Padiri Phocas BANAMWANA

Umunyamabanga wa Arkidiyosezi ya Kigali

 

Leave a Reply

Your email address will not be published. Required fields are marked *