Nta wari ukwiye kurara inda irimo ubusa kandi ku isi hari ibyo kurya bihagije

Kuri uyu wa kane tariki ya 29 Nzeri 2022, Nyirubutungane Papa Fransisiko yagejeje ku   ishami ry’Umuryango w’Abibumbye rishinzwe ibiribwa n’ubuhinzi ubutumwa bujyanye n’umunsi mpuzamahanga  wo gushishikariza abatuye isi  kutangiza no kudatakaza ibiribwa.  Papa Fransisiko yavuze ko anenga ubusumbane bugaragara mu kugerwaho n’ibiribwa ku batuye isi nyamara kandi hari  abafite ibirenze ibyo bakeneye. Papa yasabye buri wese kongera kuzirikana uburyo abayeho kugirango hatagira uwibagirana kandi buri wese abashe kubona ifunguro akeneye. Papa Fransisiko yavuze ko kwangiza cyangwa gutakaza ibiribwa bikwiye kurwanywa kuko bituma isi ikomeza gucikamo ibice bibiri: “abafite byinshi  by’umurengera  ndetse n’abatabasha kubona  iby’ingenzi bakeneye kugirango babashe kubaho” ; bikomeza kongera ubusumbane mu bantu; bibyara akarengane kandi bigatuma abakene batabasha kubona iby’ingenzi bakeneye kugirango babashe kubaho mu cyubahiro bakwiye. Papa yakomeje avuga ko ijwi ry’abantu bashonje, babujijwe ku buryo ubu n’ubu umugati ubatunga, rigomba kumvikanira mu bigo bifata ibyemezo. Ku isi, miliyari 3 z’abantu ntizibasha kubona ifunguro rikwiye. Naho miliyoni 828 barashonje. Ningombwa kugabanya rero ibiribwa byangirika cyangwa bitakara.

 

Umwanditsi

Padiri Phocas BANAMWANA

Umunyamabanga wa Arkidiyosezi ya Kigali

 

Leave a Reply

Your email address will not be published. Required fields are marked *