Kiliziya irabakeneye

“Kiliziya ikeneye kubona abana bayo cyane cyane urubyiruko rwishimye. Kiliziya irabakeneye, ikeneye kubavomaho ubugiraneza, ubushake bwo kubaka isi yubakiye ku ndangagaciro, y’ubuvandimwe, amahoro, ubwiyunge n’ubwumvikane.” ( Papa Fransisiko).

 

Uyu munsi ku wa mbere tariki 10 Ukwakira 2022, Nyirubutungane Papa Fransisiko yagiranye ikiganiro n’urubyiruko gatolika rusaga 300 ruturutse mu gihugu cy’Ububiligi.. Ashingiye ku bikubiye mu rwandiko rwe rwa gishumba rugenewe urubyiruko ” Christus Vivit”  Kristu ni muzima, rwo muri Werurwe 2019, yashishikarije urubyiruko kutagira ubwoba mu bizazane  bahura nabyo, ko ahubwo bakwiye kuba isoko y’Ibyishimo n’abahamya b’ivanjili cyane cyane muri iyi si yugarijwe n’imico igenda yigizayo Imana.

Papa yerekanye uburyo ashyigikiye mu rukundo rwa kibyeyi urubyiruko rwose rufite inshingano zo gukuza no kogeza hose iyobokamana mu maparuwasi, mu miryango itandukanye no mu matsinda y’abasenga. Papa yakomeje ashimira ubwitange n’umurava bafite bigaragarira mu buhamya bw’ubuzima bwabo muri iyi si igenda yihunza iby’Imana.   Yashimiye uru rubyiruko, ababwira ko aribo mbaraga za Kiliziya y’uyu munsi n’iy’ejo hazaza: ” Kiliziya ikeneye kubona abana bayo cyane cyane urubyiruko rwishimye. Kiliziya irabakeneye, ikeneye kubavomaho ubugiraneza, ubushake bwo kubaka isi yubakiye ku ndangagaciro y’ubuvandimwe, amahoro, ubwiyunge n’ubwumvikane.” ( Papa Fransisiko).

Papa yabwiye urubyiruko ati : “nziko mwifuza Kiliziya igizwe n’abagabo n’abagore bafite ukwemera kutajegajega. Kubera iyo mpamvu ndabasaba kwibaza uruhare rwa buri wese kugira ngo tubigereho. Nkora iki mu rugendo rwo kubaka umuryango w’abakristu wishimye”? Papa yakomeje asaba urubyiruko kuba abaharanira amahoro muri bo ubwabo no mu duce batuyemo, kugira ngo isi dutuye yongere imenye ubwiza bw’urukundo, bwo kubana kivandimwe ndetse n’ubufatanye. Papa yashoje asaba urubyiruko kutarangazwa n’ibintu by’agaciro gake isi ibereka ahubwo bakibanda kuk’ingenzi aricyo dukomora ku rukundo  dufitanye na Yezu Kristu.

 

Umwanditsi:

Diyakoni Joseph GWIZA

Iseminari Nkuru ya Nyakibanda

Leave a Reply

Your email address will not be published. Required fields are marked *