Noheli: Umunsi w’ivuka ry’Umwami w’amahoro: Inyigisho ya Arkiyepiskopi wa Kigali mu misa y’igitaramo cya Noheli

“Babyeyi, murere neza abana mushishikaye, mubatoza gukunda Imana no kuyubaha, mumenye iby’abana banyu bahugiyemo, ibyo bigishwa mu mashuri, no mumbuga nkoranyambaga; ejo natwe tutazatungurwa”.

Noheli niwo munsi mukuru ukomeye ubaho ku isi ndetse nabo mu ijuru tuwizihiriza hamwe. Amateka y’isi yacu agizwe n’ibice bibiri. Igice cya mbere ni mbere ya Noheli, mbere y’ivuka rya Yezu. Aho tubara imyaka duhereye kuri Noheli tugasubiza inyuma.Ingoma y’Abaroma yabayeho mu mwaka wa 27 mbere ya Yezu. Yezu yavutse ku Ngoma ya Kayizali, umwami w’abaromani irangira muri 330 nyuma ya Noheli. Ubu turi mu mwaka wa 2023 nyuma ya Noheli. Ndetse muri 2025 tuzizihiza yubile y’imyaka 2025 noheli izaba imaze. Ingoma y’abafarawo yabayeho imyaka 3000 mbere ya Noheli. Abrahamu yagiye mu misisri mu 1850 mbere ya Noheli. Musa yayoboye abisiraheli bava mu misiri mu 1250 mbere ya Noheli. Ibyo bitwumvisheko umunsi wa noheli ukomeye.

Noheli ni umunsi w’ibyishimo

Noheli ni umunsi w’ibyishimo bikomeye ku bantu bose kuko Imana yashatse kutugaragariza urukundo idukunda yohereza umwana wayo, Jambo wayo waremye ijuru n’isi,ibirimo byose byabayeho kubwe kandi biriho kubwe. Niyo mpamvu ari ibyishimo kuri twese. Muri iki gihe isi yacu usanga abantu bahangayitse kubera intambara ziriho, ubukene, ubushomeri, impagarara, amakimbirane,bibuza abantu amahaoro,bigatuma bashobora kwiheba babona nta mizero. Umukiza wacu watuvukiye aduha kwizera kuko turi kumwe nawe, kandi ntacyo twaba turi kumwe:”Uhagarikiwe n’ingwe aravoma”. Aba yizeye ushobora byose. Twebwe rero dufite Imana.

Yezu Kristu ni urumuri nyakuri

Isomo rya mbere umuhanuzi Izayi yahanuye mu mwaka wa 735 mbere ya Noheli, icyo gihe Abayisiraheli bari bugarijwe n’intambara, ahanura agira ati: “abantu bari mu mwijima babonye  urumuri nyamwinshi, abari batuye mu gihugu cy’icuraburindi urumuri rwabarasiyeho,wabagwirije ineza, ubaha ibyishimo”.Umuhanuzi yahanuraga umunsi wa noheli,avuga urumuri rwa noheli. Kimwe mubiranga noheli ni urumuri. Igisobanuro cy’imitako ya Noheli ni urumuri rwa Yezu wavutse. Hari aho batagishyiraho “Noheli nziza” bakandikaho ngo “iminsi mikuru myiza”, ni uburyo bwo kudashaka ko izina rya Kristu rigaragara kandi ariwo mutima wa Noheli, Kristu niwe rumuri. Ibyo ni ibintu tubona muri iki gihe byo gushaka guhinyuza Imana, bireze muri iki gihe, tugomba kwitonda ntitugendere mu kigare. Mwabonye impaka ziriho muri iyi minsi aho abantu babana bahuje igitsina, umugabo akavuga ati nzashaka undi mugabo, umugore ati nzashaka undi mugore, bagashaka no kuyobya Kiliziya ngo ibemerere guhabwa umugisha nk’urugo.  Ariko urugo rugizwe n’umugabo n’umugore bakundana, bunze ubumwe kandi ubumwe bw’indatana ndetse bagamije kubyara. Muri Kiliziya turugarijwe ni ugusenga. Bikira Mariya i Kibeho yaratuburiye ati “mwicuze, mwicuze, isi imeze nabi; musenge nta buryarya kandi musabire cyane Kiliziya, kuko ubuhakanyi buzaza bwiyoberanyije”, usange bwaratwinjiriye.

Tugendere murumuri

Nkuko Pawulo mutagatifu abivuga mu ibaruwa yandikiye Tito: ni ukureka kugomera Imana, tukareka gutwarwa n’irari ry’iby’isi kugirango guhera ubungubu tubeho turangwa n’ubwitonzi, ubutungane n’ubusabaniramana. Nicyo Umukiza watuvukiye adusaba kugendera muri urwo rumuri. Babyeyi, murere neza abana mushishikaye, mubatoza gukunda Imana no kuyubaha, mumenye iby’abana bacu bahugiyemo, ibyo bigishwa mu mashuri,no mumbuga nkoranyambaga; ejo natwe tutazatungurwa.

Bavandimwe Kristu yatuzaniye urumuri ngo dushobore kubona neza urukundo Imana idukunda, ineza n’umukiro Imana idushakira.Tugendere mu rumuri. Iyo umuntu ari mu mwijima ntabwo amenya aho ari ndetse ibimukikije ntamenya agaciro kabyo. Mu mwijima , umuntu wese ubonye uramwikanga nk’umujura  cyangwa umugome ndetse ukaba wamuhitana ugirango urarengera umutekano wawe. Nyamara wabona urumuri ukaza gusanga ari umuvandimwe wawe, warugiye kwihekura. Yezu yaje kuduhishurira ko twese turi abavandimwe akaba ariwe utumurikira kugirango tumenyeko turi abavandimwe. Noheli ni umunsi w’urumuri. I Yeruzalemu bari mu mwijima wo kutamenya Imana. Bikira Mariya wari utwite yenda kubyara ntibamenya ko yaratwite nyir’ijuru n’isi nuko babona ari umugore w’umukene ushaka icumbi bati komeza hano ntamwanya shakira mubashumba niho abakene bacumbika. Koko kandi abashumba baramwakiriye bagira amahirwe ko aribo bambere bahishuriwe inkuru nziza ya Noheli, ijuru ribakingukira hejuru, umumalayika wa Nyagasani abahagarara iruhande, ikuzo rya Nyagasani ribasesekazaho urumuri maze bashya ubwoba,maze malayika arabahumuriza ati “mbazaniye  Inkuru nziza ikomeye izashimisha umuryango wose, none mu mugi wa Dawudi mwavukishije Umukiza ariwe Kristu Nyagasani. Dore ikimenyetso kimubabwira, murasnga uruhinja rworoshe utwenda ruryamye mu kavure”. Nuko ako kanya inteko y’abamalayika igaragara iririmba Gloria.

Noheli rero ni umunsi w’ibyishimo bikomeye ku isi no mu ijuru. Ku isi bari bakiri mu mwijima bataramenya ibyabaye,batarabona urumuri rwa noheli, mu gihe mu ijuru Noheli yari yatangiye basingiza Imana aribyo abamalayika basogongezaga kubashumba bari bakiriye Yezu. Imana nisingizwe kuko yadukunze bihebuje. Bavandimwe, turamutse tumenye neza urukundo rukomeye Imana idukunda ntawatinyuka gucumura ku Mana cyangwa kwitandukanya nayo, nta nuwatinyuka guhemukira umuvandimwe we kuko amubonamo umwana w’Imana n’umuvandimwe we. Noheli ni ivuka ry’Umwami w’amahoro. Abantu bamenye Kristu n’urukundo rw’Imana aduhishurira, ntawagira icyo apfa n’undi, ntawagira icyo ahemukira mugenzi we, bose bakishimira kubana m’ubuvandimwe , amahoro y’Imana akaganza hose.

Bavandimwe, mwese musangire Inkuru nziza ya Noheli mu ngo zanyu, mubaturanyi banyu, mukomeze abihebye n’abafite ibibazo binyuranye,mubahumuriza ko Kristu umukiza watuvukiye, mubasangize ku nkuru nziza y’amizero kuko Imana idukunda byahebuje, Yo yaduhaye n’umwana wayo ngo abane natwe ni iki kindi itadukorera.Mugire noheli nziza kandi muyisangire kivandimwe.

Leave a Reply

Your email address will not be published. Required fields are marked *