“Dushimire Imana yaduhaye gutsinda ku bw’Umwami wacu Yezu Kristu ” 1Kor 15,55-58: Inyigisho ya Arkiyepiskopi wa Kigali mu misa y’igitaramo cya pasika  31 Werurwe 2024

Pasika ni igitangaza gikomeye Imana yakoze gituma twumva koko ko Yezu ari Umwana w’Imana, ari Imana, Jambo waremye ijuru n’isi wigize umuntu. Urupfu rwari rwarazonze muntu nuko ruribeshya rufata na Yezu. Yezu bari barabonye abyiruka mu bandi bana i Nazateti. Bakavuga bati ni umuhanuzi ariko ni umuntu turamuzi ni mwene Yozefu w’umubaji na Mariya. Urupfu ruribeshya ndetse n’abanzi be bamwigambaho bamusuzuguye, ab’umutima mwiza ushima bararira barahogora n’abanyamahanga bashyira mu kuri nka wa musirikare w’umuromani yabonye ukuntu Yezu apfuye ababarira abishi be ati, “Uyu koko yari Umwana w’Imana.” Uyu Yezu rero yagaragaje ko ari umuntu koko, urupfu rumuhitana, ariko ko ari n’Imana koko irusha urupfu imbaraga arazuka. Urupfu rwari rwarigenje ararutsinda. Paulo Mutagatifu niwe ugira ati, «Urupfu rwaburijwemo n’umutsindo.  Rupfu we! Ugutsinda kwawe kuri he? Urubori rwawe ruri hehe, wa Rupfu we?…Dushimire Imana yaduhaye gutsinda ku bw’Umwami wacu Yezu Kristu. ” 1Kor 15,55-58.

Iyi nkuru nziza ya Pasika niyo vanjili ya mbere yabanje kwandikwa. Ukuzuka kwa Kristu kwatanze urumuri rutuma tubona neza Yezu Kristu uwariwe. Yezu apfuye abigishwa barihebye bagira agahinda n’ipfunwe ko uwo bari batezeho umukiro yishwe birangiye. Bamwe barikingirana abandi bafite iyo bajya nk’ababandi b’i Mawusi bajya kwishakira imibereho. Nibwo aba bagore bamenye iyi nkuru nziza bwa mbere babikesha urukundo rukomeye bakundaga Yezu. Nibo banambiye Yezu ku musaraba bamuba hafi bemera gutukwa no gucirwa mu maso. Apfuye bababazwa nuko badashoboye kumushyingura mu cyubahiro. Sibo babonye bucya bazindukira ku mva ye basanga atarimo yazutse babwira intumwa ntizabyumva, ntizabyemera zijya kwirebera. Yezu wazutse agenda abiyereka ari muzima, amaso yabo arahumuka bati burya bwose Yezu koko ni Imana Rurema twagendanaga nayo. Batangira gusubiza amaso inyuma bibukiranya amagambo ye. Uziko yari yarabitubwiye ko Umwana w’umuntu azafatwa akicwa ariko akazazuka nyuma y’iminsi itatu, ati iyi ngoro nimuyisenye nzayubaka mu minsi itatu… batangira kugenda basubira inyuma basuzuma inyigisho ze n’ibitangaza bye bati twari kumwe n’Imana nyirububasha ntitubimenye. Harya ubundi yavukiye he? Yakuze ate ? Ni uko nguko ivanjili yagiye yandikwa basubiza amaso inyuma bamurikiwe n’ukuzuka kwa Kristu aho yagaragaje koko ko ari Imana irusha imbaraga urupfu.

Intumwa zatangiye rero kwigisha Kristu wazutse akadutsindira urupfu noneho nicyo natwe ubu tugomba gukora. Mu isomo rya mbere mu kiragano gishya Paulo Mutagatifu aratubwira ko natwe ubungubu ababatijwe twabatijwe mu rupfu rwa Kristu kuko twapfuye ku cyaha none tukaba tubereyeho Imana muri Kristu Yezu wazutse. Ababatijwe tukavuka mu buzima bushya burusha imbaraga urupfu natwe tuzazuka tubeho iteka nawe. Intumwa kandi zasubizaga amaso inyuma no mu byanditswe bitagatifu bya kera bagashobora gusobanukirwa n’umugambi w’Imana wo gukiza abantu uko byagiye bihanurwa. Iyi batisimu niyo Umuhanuzi Ezekiyeli yahanuye ati, “Nzabaha umutima mushya, mbashyiremo n’umwuka mushya. Mu mubiri wanyu, nzakuramo umutima w’ibuye, nshyiremo umutima wumva. Nzabuzuzamo umwuka wanjye, mbatere gukurikiza amategeko yanjye, mwubahirize amabwiriza yanjye.” (Ezk 36).Ninayo Imana yasogongeje umuryango wayo igihe ibarokora mu bucakara mu Misiri ikabakiza urupfu ibambutsa inyanja y’umutuku. Aya mazi yahanuraga aya batisimu adukiza icyaha n’urupfu akaduha ubuzima bw’iteka.

Mu isomo rya mbere ubona ukuntu umuremyi wabyose yaremye muntu imuha ibindi biremwa byose ku isi ngo abigenge abiyobore mu gusingiza Imana. Iramutonesha ariko aza gucumura yikururira urupfu. Imana ariko itangira umugambi wo kumukiza. Mu isomo rya kabiri itora Abraham kuzabera abantu umukurambere w’abayemera bakayizera. Abrahamu yizeraga Imana bikomeye kugezaho atsinda ikigeragezo cyo kwikunda yemera gutanga n’umwana we wenyine afite. Umuntu atazi ukuzuka kwa Kristu yakwibaza ukuntu Imana ishimishwa n’urupfu, ariko kwari ukutwereka ukwemera, ukwizera n’urukundo Abrahamu yarafitiye Imana agira ati niyo ibizi ntacyo nakwima Imana nubwo byaba amagara yange bwite. Kandi koko Umwana ntiyamutambye. Ariko Kristu we yemeye no gupfa kubera urukundo rukomeye adukunda no kugirango aducungure adukize.

Bavandimwe rero muri iki gihe tubona ko kenshi abantu babayeho mu guhangayika ndetse no kwiheba imbere y’ibibazo by’ubuzima muri iyi si. Ibiza, indwara z’ibyorezo nka COVID-19 byahungabanyije abantu n’ibintu, ubumenyi n’ikoranabuhanga twari twizeye bikabikuba na zero ntawuzi icyakorwa. Ubwumvikane bucye n’amakimbirane mu ngo no mu bavandimwe, abakorana bagacikamo ibice, intambara hagati y’amoko n’ibihugu, bagasenya ibyo bari bamaze kubaka, ubukungu bugahungabana. Uguhangayika no kwibaza aho isi yacu igana. Abato bakibwirako bahungira ahandi nyamara iyi si hose harava ntaho wakugama. Kristu wemeye kutwitangira kugeza ku rupfu ariko akazuka niwe wenyine mizero yacu. Umuzi w’ibibazo muntu ahura nabyo ni ukwikunda no kwireba agashyira imbere inyungu ze gusa. Niba buri wese cyangwa benshi bakoze gutyo ntwabwo bahuza, ntibumvikana. Uhereye mu rugo, abashakanye aribwo bumwe bukomeye bubaho mu bantu, mu bavandimwe, mu bakorana, umubano hagati y’ibihugu nuko. Niho amakimbirane n’amahane akomoka tukabura amahoro n’amizero. Kristu rero waduhaye urugero rw’urukundo rwitanga byimazeyo, rwizera Imana niyo yonyine izi neza igifitiye buri muntu akamaro ikamenya no kubihuza n’inyungu rusange hamwe n’ibindi biremwa bidukikije ni isi iduhetse. Imana rero niyo yonyine mizero yacu Yezu Kristu wazutse aduhamagarira kurangamira.

Pasika Nziza!!!

 

 

 

 

 

Leave a Reply

Your email address will not be published. Required fields are marked *