Abana b’abaririmbyi “Pueri Cantores” ba Arkidiyosezi ya KIGALI, basaga 322 bitabiriye ihuriro ry’umuryango w’abana b’abaririmbyi Pueri Cantores ku rwego rw’igihugu (Congress National Pueri Cantores) ry’iminsi 3, ribaye ku ncuro yaryo ya 9, ryasojwe kuri uyu wa gatatu tariki ya 27/08/2025, ryaberaga muri Paruwasi yaragijwe Mutagatifu Karoli LWANGA/NYAMIRAMBO, iherereye muri Arkidiyosezi ya KIGALI, ryatangiye kuva kuri uyu wa mbere tariki ya 25-27/08/2025.
Arkiyepiskopi wa KIGALI, Nyiricyubahiro Antoni Cardinal KAMBANDA, akaba na Prezida w’Inama y’Abepiskopi Gatolika mu RWANDA, ni we watangije ku mu mugaragaro iri huriro, ryitabiriwe n’abana basaa 1300 baturutse mu ma Diyosezi Gatolika mu RWANDA uko ari 9: Arkidiyosezi ya KIGALI, Diyosezi Gatolika ya KABGAYI, BYUMBA, KIBUNGO, BUTARE, CYANGUGU, RUHENGERI, GIKONGORO na NYUNDO.
Iri huriro kandi, ryitabiriwe na Padiri Egide NSABIREMA, umuyobozi w’ishuri rya Saint Andre, akaba n’umuyobozi wa Pueri Cantores ku rwego rwa Arkidiyosezi ya KIGALI, Padiri Romuald KUBWIMANA, Omoniye wa Pueri Cantores ku rwego rw’igihugu, n’abandi batadukanye bashinzwe Pueri Cantores mu ma Paruwasi baturutsemo.
Arkiyepiskopi wa KIGALI, akaba na Prezida w’inama y’Abepiskopi Gatolika mu RWANDA, Nyiricyubahiro Antoni Cardinal KAMBANDA, mu butumwa yatanze mugusoza iri huriro, yavuze ko iyo Pueri Cantores rero iririmba basingiza Imana bitera amahoro ku isi.
“Ndagira ngo rero mbashimire kandi mvuga nti mukomeze kuba abaririmbyi b’amahoro. Amahoro ya mbere ni amahoro y’Imana. Pueri Cantores y’abana b’abaririmbyi, gusingiza Imana bitera amahoro ku isi. Abamalayika igihe Yezu avuka i BETELEHEMU baduhaye ubutumwa Imana nisingizwe mu ijuru n’abantu ku isi babone amahoro. Pueri Cantores rero iyo muririmba musingiza Imana bitera amahoro ku isi”.
Yaboneyeho kubasaba kugira uruhare mu gutera amahoro mu ngo zabo, muri Paruwasi zabo, muri Diyosezi zabo, mu gihugu cyabo, muri Afurika, no ku isi. Kuko Pueri Cantores ari isi yose, yabasabye kuyatera isi yose.
Umuryango w’abana b’abaririmbyi “Pueri Cantores” uhuriza hamwe abana b’abaririmbyi. Waragijwe Mutagatifu Dominiko Savio. Ubutumwa bwabo bwose bukubiye mu ntego igira iti “EJO, ABANA B’ISI YOSE BAZARIRIMBA AMAHORO Y’IMANA”.
Umuryango Pueri Cantores umaze imyaka 118 ubayeho ku isi, n’imyaka 68 ishize ushinzwe mu RWANDA. Wavukiye mu gihugu cy’UBUFARANSA mu mwaka 1907. Gusa Pueri Cantores si Chorale isanzwe gusa, ahubwo ni umuryango wa Agisiyo Gatolika, ni amarerero y’ukwemera.
Mu RWANDA yatangiye ku gitekerezo cya Musenyeri Andreya Parodin abisabye Padiri Pierre Butri wari Vicaire wa Vicariati ya KABGAYI. Umuryango watangiriye muri Paruwasi ya NYUMBA, muri Diyosezi Gatolika ya BUTARE mu mwaka 1957. Gusa aha watangiriye ntiwabashije kuhamara igihe, kuko waje gukomereza muri Paruwasi Cathédrale ya KABGAYI, muri Diyosezi Gatolika ya KABGAYI, uhatangira mu mwaka 1961.
Gusa ariko iri torero ryo muri Paruwasi ya NYUMBA ryatanze umusaruro, kuko ari wo wabonetsemo umupadiri wa mbere wabaye muri Pueri Cantores mu RWANDA, Padiri Venuste RINGUYENEZA.
Muri rusange ariko uyu muryango wakomeye ndetse waguka uhereye i KABGAYI. Nyuma yaho hakurikiyeho itorero ryo muri Paruwasi ya ZAZA, ho muri Diyosezi Gatolika ya KIBUNGO, hakurikiraho iryo muri Paruwasi ya RWAZA, ho muri Diyosezi ya RUHENGERI.
Pueri Cantores muri Arkidiyosezi ya KIGALI yavutse ari iya 6 mu RWANDA, aho yatangiriye muri Paruwasi ya RUTONGO tariki ya 22/12/1968, nibwo abana ba mbere basezeranye, bakaba bari 65.
Muri Arkidiyosezi ya KIGALI, Pueri Cantores imaze kugera mu maparuwasi 16 gusa mu maparuwasi 44 ayigize. Hakaba n’andi ma Paruwasi 8 yiteguye kwakirwa mu muryango. Muri uyu mwaka 2025 hari 4 azakirwa: Tariki ya 31/08/2025 hazakirwa itorero ryo muri Paruwasi ya KIMIHURURA, tariki ya 07/09/2025 hazakirwa irya Paruwasi ya KARAMA, tariki ya 05/10/2025 hazakirwa irya Paruwasi ya RUSHUBI, n’itorero rya Paruwasi ya RULINDO.
Umwaka utaha wa 2026 hazakirwa itorero rishya rya Paruwasi Cathedrale Saint Michel, irya Paruwasi MUNANIRA, Irya Paruwasi MUGOTE, n’itorero rya Paruwasi ya KABUYE. Ahandi hasigaye haracyari gukorwa ubutumwa bwo kureba uko Pueri Cantores yahatangizwa.
Ubutumwa bwa Pueri Cantores bugamije: Gucengeza mu bana indirimbo za Litulugiya kandi abo bana bakabigiramo uruhare, kwigisha abana kubaho gikristu kandi kimuntu, kubacengezamo ubugwaneza bushingiye kubaha ijambo ry’Imana ndetse n’ubufatanye bwa kivandimwe, gukangurira abanyamuryango ubwumvikane bushingiye ku mubano nyawo, kugira ngo huzuzwe intego y’ubutumwa bwabo igira iti “EJO, ABANA B’ISI YOSE BAZARIRIMBA AMAHORO Y’IMANA”, hari kandi gufasha abakristu kurushaho gusenga no kwifatanya nabo haba mu gitambo cya Misa cyangwa no mu yindi mihango yahuje abakristu.
Abana b’abaririmbyi “Pueri Cantores” ba Arkidiyosezi ya KIGALI, basaga 322 bitabiriye ihuriro ry’umuryango w’abana b’abaririmbyi Pueri Cantores ku rwego rw’igihugu, baturutse mu ma paruwasi 16 muri 44 ayigize.
Umwihariko wayo muri uyu mwaka ni uko iyi Congress ibaye mu gihe Kiliziya iri mu mwaka wa Yubile y’impurirane: Iy’imyaka 2025 Yezu Kristu yigize umuntu aje gucungura isi, n’iy’imyaka 125 Ivangili ye igeze mu RWANDA. Insanganyamatsiko y’iyi Yubile ikaba itsindagirwa cyane n’intego ya Pueri Cantores yo guharanira amahoro binyuze mu muryango wabo. Kuko insanganyamatsiko ya Yubile igira iti “TURANGAMIRE KRISTU, SOKO Y’AMIZERO, UBUVANDIMWE N’AMAHORO”.
Mu nyigisho bahawe muri iri huriro bagize umwanya wo gusobanurirwa imizi y’ubukristu mu RWANDA, ibakangurira kuba maso no gusenga, iyavugaga kuri Liturugiya no gushengerera, ivuga ku miryango ya Agisiyo Gatolika ikora ubutumwa muri Kiliziya, ijyanye n’ubutumwa Pueri Cantores ikora, n’ibindi bitandukanye.
Mu gusoza iri huriro abana 57 bakoze amasezerano yo kwinjira muri Pueri Cantores. Kuririmba ni uburyo bwiza bwo kwegera Imana, kuyamamaza, no kogeza Ivangili.
