Kuri iki cyumweru tariki 27/07/2025, hizijwe Yubile y’umuryango no gusabira ingo ku rwego rwa Arkidiyosezi ya KIGALI, mu birori byabereye muri Paruwasi ya Regina Pacis/REMERA, irangajwe imbere n’insanganyamatsiko igira iti: “URUGO RUBE KOKO IGICUMBI CY’ABAHAMYA B’AMIZERO, UBUVANDIMWE N’AMAHORO”.
Igitambo cy’Ukarisitiya cyatuwe na Arkiyepiskopi wa KIGALI, Nyiricyubahiro Antoni Cardinal KAMBANDA, akikijwe n’umushumba wa Diyosezi Gatolika ya UVILA, muri DRC, uri mu kiruhuko cy’izabuku, Myr Jérôme GAPANGWA, n’abandi basaserdoti banyuranye.
Kwizihiza Yubile y’umuryango ku rwego rwa Arkidiyosezi ya KIGALI, byabaye mahire ko byahuriranye no kwizihiza umunsi mukuru mpuzamahanga wa ba sogokuru na ba nyogokuru n’abageze mu zabukuru ku ncuro ya 5, kuko ari bamwe mu bafite ubunararibonye ku mibereho y’ingo n’umuryango.
Arkiyepiskopi wa KIGALI, Nyiricyubahiro Antoni Cardinal KAMBANDA, yavuze ko kwizihiza iyi Yubile y’umuryango ku rwego rwa Arkidiyosezi ya KIGALI biri mahire ko byahuye n’umunsi mukuru mpuzamahanga w’abasheshe akanguhe, kuko abasheshe akanguhe bari mu bantu bagize umuryango.
“Uyu munsi Arkidiyosezi ya KIGALI yafashe kwizihiza Yubile y’umuryango ku rwego rwa Diyosezi, bikaba ari mahire ko bihura n’umunsi mukuru w’abasheshe akanguhe, umurage Nyirubutungane Papa Francisco yadusigiye. Abasheshe akanguhe akaba ari mahire kuko bari mu bantu bagize umuryango, ndetse uruhare runini kubibuka no kubasabira ndagira twishimire cyane abasheshe akanguhe bashoboye kuza ngo bifatanye natwe”.
Umunsi mukuru mpuzamahanga wa ba sogokuru na ba nyogokuru, n’abasheshe akanguhe ubusanzwe wizihizwa buri mwaka tariki ya 26, umunsi Kiliziya yizihizaho abatagatifu Yowakimu na Ana ababyeyi ba Bikira Mariya, bakaba n’abasekuru na nyirakuru ba Yezu. Gusa iyo umunsi mukuru wa Kiliziya udahuye n’icyumweru uhita wizihizwa ku cyumweru gihita gikurikira. Bikaba kuri iyi ncuro byizihirijwe hamwe n’iyi Yubile.
Cardinal KAMBANDA, yakomeje avuga ko imiryango yose iba ifite inkomoko kuri ba basogokuru na ba nyogokuru. Avuga nko muri iki gihe ku bashyingira abato hari benshi baba bafite amahirwe y’uko ababyeyi bari kumwe, bagashyingira abana babo, ndetse hari n’abafite amahirwe yo kuba hari ba sekuru na banyirakuru, ibi bikagaragaza uruhererekane rw’umuryango. Bityo ko umuryango wizihijwe uyu munsi isoko yawo n’imbagara zawo biha amizero imiryango iri gushingwa uyu munsi. Ibi bikaba bihuza na Yubile y’uko barangamira Kristu soko y’amizero yabo, amahoro n’ubuvandimwe.
Nyiricyubahiro Antoni Cardinal KAMBANDA, yongeyho ko basogokuru na ba nyogokuru ari ikimenyetso cy’amizero, nk’uko insanganyamatsiko y’uyu mwaka wa Yubile ibigaragaza.
“Umuryango ni cyo gicumbi cy’ubuvandimwe, ndetse bunubaka n’amahoro. Basogokuru na ba nyogokuru ni ikimenyetso cy’amizero. Abantu bamaranye igihe, basazanye baha abato bashinga ingo muri iki gihe kwizera ko urugo ruramba kandi ko abashakanye basazana bishimye n’urukundo rwabo rugenda runoga rugakomera kurushaho. Mucyo rero dushimire Imana ibi byose, kandi dusabire ingo zacu, ingo zigishingwa muri iyi myaka ya vuba no mu minsi ya vuba, ingo zikuzemo, n’ingo z’abasheshe akanguhe, byose tubishimira Imana”.
Ihimbazwa rya Yubile y’umuryango ryabimburiwe na Forum y’ingo, yitabiriwe na za Couples (umugabo n’umugore), ababyeyi bibana, n’urubyiruko ruhagarariye abandi. Bimwe mu byaranze iyi Forum y’ingo harimo inyigisho bahawe n’ibindi, bazibabwa bari muri aya matsinda yabo ukwabo, kugira ngo ngo bashyigikiranye mu mibereho babayemo.
Abitabiriye iyi Forumu y’ingo baturutse mu ma Paruwasi yose agize Arkidiyosezi ya KIGALI, aho muri zone y’umujyi hazaturutse Couples 4 n’abibana 2. Abaturutse muri zone z’icyaro Couples 2 n’uwibana umwe, hakaba hari harimo n’abahagariye urubyiruko. Naho ku munsi mukuru wa Yubile hakaba yitabiriye abagize umuryango muri rusange (Familles), ni ukuvuga abantu bose bagize umuryango: Ababyeyi, abana, abihaye Imana, abyariye iwabo n’abandi.
Yabimburiwe n’igitambo cy’Ukaristiya cyo kuyifungura ku mugaragaro (Forum y’ingo), cyatuwe na Musenyeri Casmir UWUMUKIZA, igisonga cya Arkiyepiskopi wa KIGALI, Nyiricyubahiro Antoni Cardinal KAMBANDA, ku wa gatanu tariki ya 25/07/2025, wamuhagarariye muri uyu muhango, kuko atabashije kubonaka.
Aitabiriye Forum y’ingo basaga 250 baturutse hirya no hino mu ma Paruwasi agize Arkidiyosezi ya KIGALI. Muri bo ababyeyi bibana ni 50, abashakanye bakiri kumwe 190 n’urubyiruko 10. Bahawe izi nyigisho mu rwego rwo kubafasha kuzinjira neza mu ihimbazwa rya Yubile, bayumva neza, bumva akamaro kayo, babafasha no kurushaho gucengera neza insanganyamatsiko ibafasha kuyizihiza neza.
Izi nyigisho bazihawe mu buryo bukurikira: Ku munsi wa mbere bahawe inyigisho, aho Abashakanye bahawe inyigisho igira iti “Twembi duhange amaso Yezu Kristu we nkingi y’urugo rw’abashakanye”. Hebréux 12,2. Ababyeyi bibana bahawe inyigisho igira iti”Guhanga amaso yacu Yezu Kristu mu kigeragezo cy’ubupfakazi”. Mathieu 11,28.
Kuri uwo munsi kandi hakurikiyeho inyigisho nayo igenewe abashakanye igira iti “Yezu Kristu mbaraga z’ubumwe n’urukundo rwa kivandimwe mu rugo “. Colessiens 3, 13-14. Ijyana n’indi ku rundi ruhande yahawe ababyeyi bibana igira iti “Yezu Kristu ni we mizero adatenguha”. 5,5.
Ku munsi wa kabiri wa Forum ku wa gatandatu tariki ya 26/07/2025 hatanzwe inyigisho ku bashakanye igira iti “Impano y’ububyeyi ibe koko isôko y’urukundo hagati y’abashakanye, amizero no guteganya imbyaro”. Intg1,28. Ku rundi hari hari gutangwa indi nyigisho ku babyeyi bibana igira iti “Yezu Kristu yaduhaye abavandimwe kugira ngo tugendane. Ps 133,1.
Kuri uwo munsi kandi hatanzwe indi nyigisho ku bashakanye igira iti “Kubabarira: Inzira igana amahoro atangwa na Kristu”. Mathieu 5,9. Ku rundi ruhande ababyeyi bibana nabo bahawe inyigisho igira iti “Inzira itanga amahoro y’umutima hamwe na Yezu Kristu”. Jean 14,27.
Ku cyumweru 27/07/2025, ku munsi nyirizina w’iyi Yubile y’umuryango, mbere y’igitambo cy’Ukarisitiya cyo kuyihimbaza habanje inyigisho yahawe abashakanye igira iti “Ibyishimo by’umuryango urukundo rw’abashakanye sôko y’amizero”. Mathieu. Ku rundi ruhande ababyeyi bibana nabo bahawe inyigisho igira iti “Kwera imbuto mu kiciro gishya cy’ubuzima”. Ps 126,5.
Muri uku kwizihiza Yubile y’umuryango ku rwego rwa Arkidiyosezi ya KIGALI hanatanzwe Certificates ku bafasha b’ingo 8 ku ncuro ya mbere ku bo mu ma Paruwasi yabimburiye andi: NYAMATA, RUTONGO, KARENGE, MBOGO, Regina Pacis/REMERA, KACYIRU, MUGOTE, n’umwe ukora mu biro bishinzwe icyenurabushyo rw’umuryango muri Arkidiyosezi ya KIGALI.
Abakristu bari bamaze umwaka biga amasomo ajyanye na Bibiliya mu ishuri rya tumenye Bibiliya ikiciro cya mbere muri Paruwasi ya Regina Pacis REMERA, basaga 45 bahawe impamyabumenyi. Ni amasomo batangiye umwaka ushize wa 2024.
Bamwe mu bandi biyeguriye Imana bitabiriye ihimbazwa ry’iyi Yubile y’umuryango harimo: Musenyeri Casmir UWUMUKIZA, igisonga cya Arkiyepiskopi wa KIGALI, akaba n’umunyamabanga wa Komisiyo ishinzwe icyenurabushyo ry’umuryango mu nama y’Abepiskopi mu RWANDA, Padiri Ernest BIGIRIMANA, Umunyamabanga wa Arkiyepiskopi wa KIGALI, Padiri Alex NDAGIJIMANA, ukuriye icyenurabushyo ry’urubyiruko ku rwego rw’igihugu, akaba akorera ubutumwa muri Paruwasi ya Regina Pacis REMERA, Padiri Simon Pierre RUTERANA, Ushinzwe icyenurabushyo rw’umuryango muri Arkidiyosezi ya KIGALI, Padiri Pascal TUYISENGE, Padiri mukuru wa Paruwasi Regina Pacis REMERA, n’abandi basaserdoti batandukanye, abiyeguriye Imana banyuranye, n’imbaga y’abakristu banyuranye muri rusange.
Yubile y’umuryango yizihijwe mu gihe Kiliziya y’isi yose no mu RWANDA batangiye urugendo rwo kwizihiza Yubile y’impurirane mu byiciro binyuranye: Iy’imyaka 2025 Yezu Kristu yigize umuntu aje gucungura isi, n’iy’imyaka 125 ishize inkuru nziza ye (Ivangili) igeze mu RWANDA.
Biteganyijwe ko Yubile y’umuryango ku rwego rw’igihugu izizihizwa tariki ya 09/08/2025, muri Diyosezi Gatolika ya NYUNDO, ikazabimburirwa na Forum (Ihurira ry’Ingo) tariki ya 07/08/2025.
