Kuri iki cyumweru tariki ya 11/05/2025, muri Paruwasi yaragijwe Mutagatifu Yohani Baptista/RUHUHA, ku cyumweru cya 4 cya PASIKA, cyahariwe icyumweru cy’Umushumba mwiza (Yezu Kristu), hizihirijwe umunsi mukuru mpuzamahanga wo gusabira abahamagarirwa ubutumwa muri Kiliziya, ku rwego rwa Arkidiyosezi ya KIGALI. Wizihijwe ku ncuro ya 62 muri Kiliziya.
Myr Casmir UWUMUKIZA, igisonga cya Arkiyepiskopi, wamuhagarariye muri ibi birori, ni we watuye igitambo cy’Ukarisitiya, akikijwe na Padiri Pascal TUYISENGE, ukuriye Komisiyo y’umuhamagaro muri Arkidiyosezi ya KIGALI, ndetse akaba na Padiri mukuru wa Paruwasi Gatolika ya Regina Pacis/REMERA, Padiri Claudien MUTUYIMANA, umuyobozi wa Saminari nkuru ya Philosophicum KABGAYI, akaba ari n’umupadiri wa mbere uvuka muri iyi Paruwasi na Padiri Faustin DUSABIMANA, Padiri mukuru w’iyi Paruwasi ya RUHUHA.
Iki gitambo cy’Ukaristiya cyahaturiwe ni cyo cyabimburiye ibi birori byo gusabira abahamagarirwa ubutumwa muri Kiliziya, aribo: Abaserdoti, Abafurere, Ababikira, byahuje imiryango y’abihaye Imana inyuranye, ikorera ubutumwa muri Arkidiyosezi ya KIGALI igera kuri 17, baturutse hirya no hino mu ma Paruwasi anyuranye ya Arkidiyosezi.
Ni ibirori byitabiriwe kandi n’imbaga y’abakristu batandukanye, biganjemo urubyiruko, nka bamwe mu bitezweho ko bazavamo abahamagarirwa ubutumwa muri Kiliziya bakazavamo: Abaserdoti, Abafurere n’ Ababikira muri Kiliziya y’ejo hazaza, bazakorera ubutumwa hirya no hino ku isi mu miryango y’abihaye Imana inyuranye, bitangira abandi, kugira ngo nabo bafashe umuryango w’Imana gukura kuri Roho no ku mubiri, bamurikiwe n’ivangili ntagatifu. Cyangwa se bakazavamo abashinga ingo nziza zinogeye Imana.
Umuhamagaro, cyangwa gukora ubutumwa, bisaba ubushisho, kwitangira ivangili no kwitangira abandi batera ikirenge mu cya Yezu Kristu, we mushumba mwiza witangira intama ze, akazimenya, nazo zigasabwa kumwizera no kumwumvira.
Abo bose bahamagarirwa ubutumwa muri Kiliziya, bagira uruhare rwihariye mu kuyobora imbaga y’Imana, bayihumuriza, bagakomeza kwamamaza ivangili badacika intege, bakazasoza babana n’umushumba mwiza mu ijuru, bakazasangira nawe ikuzo.
Kwizihiza uyu munsi mukuru mpuzamahanga wo gusabira abahamagarirwa ubutumwa muri Kiliziya wizihijwe ku ncuro ya 62, imwe mu miryango y’abihaye Imana inyuranye, ikorera ubutumwa muri Arkidiyosezi ya KIGALI, yitabiriye guhimbaza uyu munsi mukuru ni:
1. Ababikira b’urukundo rwa Yezu na Mariya.
2. Ababikira b’aba Pénitente ba Mutagatifu Francisco w’Assise.
3. Frères Monfortain de Saint Gabriel.
4. Ababikira ba Bikira Mariya bo ku musozi wa KARUME.
5. Les Soeurs Oblate de l’Assomption.
6. Les Soeurs Salesienne des Sages Coeurs (Saint Filipo Smald.
7. Les Soeurs Disciples de Jesus Eucharistique.
8. Les Vierges Consacrée (Ordre des Vierges Consacrée).
9. Les Soeurs Pallottines.
10. Ababikira b’Abajambo.
11. Les Soeurs de l’enfant – Jesus (Ababikira b’Umwana Yezu).
12. Les Soeurs Ingoro y’Urukundo.
13. Ababikira ba Mutagatifu Mariya Madalena.
14. Les Filles du Divinzèle du Coeur de Jésus.
15. Ababikira ba Bikira Mariya Mubyeyi w’Impuhwe.
16. Abafurere umuryango wa Mariya, Marita na Lazaro.
17. Les Soeurs Hospitalière de Saint Marthe.
ARKIDIYOSEZI YA KIGALI YAHIMBAJE UMUNSI MPUZAMAHANGA W’ABAHAMAGARIRWA UBUTUMWA MURI KILIZIYA KU NCURO YA 62
