Mu rwego rwo guhimbaza Yubile y’umuhamagaro tariki ya 26/04/2026, izizihirizwa muri Paruwasi yaragijwe Mutagatifu Nikola wa Fuluwe / NDERA, ho muri Arkidiyosezi ya KIGALI, Arkidiyosezi ya KIGALI irasaba ko iri SENGESHO RYO GUSABIRA ABASASERDOTI N’ABANDI BIHAYE IMANA ryavugwa muri Paruwasi zose hamwe n’abakristu kuva ku wa kane tariki ya 23/04/2026 kugeza ku wa gatandatu tariki ya 25/04/2026, mu gusoza buri gitambo cy’Ukaristiya. Ni mu rwego kandi, rwo gukomeza kurushaho kwizihiza neza Yubile y’imyaka 50 Arkidiyosezi ya KIGALI imaze ishinzwe.
ISENGESHO RYO GUSABIRA ABASASERDOTI N’ABANDI BIHAYE IMANA
Nyagasani Yezu, mushumba mwiza, wazanywe no gushaka kurokora impabe zose ni nacyo cyatumye urema Isakaramentu ry’ubusaserdoti muri Kiliziya yawe, ngo rijye rikomeza kogeza ako gakiza kawe watuzaniye. Turagusaba dukomeje, ngo wohereze abakozi mu murima wawe; Nyagasani, gobora abasaserdoti n’abandi bihaye Imana muri Kiliziya yawe. Ba ari wowe witorera kandi wihamagarira mu muryango wawe, abo uruzi bakwiye gukora mu murima wawe, ari wo Kiliziya Gatolika ntagatifu wiremeye. Intore witoreye uzihe gukomeza inzira wazeretse ubutarora inyuma, hoye kugira ababyisukamo utabibatoreye, Nyagasani.
Bose: turakwinginga Nyagasani, ohereza abakozi mu murima wawe, ari bo twebwe abantu uko tungana. Ubahe kuba umunyu w’isi, kugira ngo imigenzereze yabo myiza ndetse n’imiruho yabo, bitubere itara nk’uko Kiliziya ibitwigisha muri Liturijiya ya Batisimu, ibikuye mu Ivanjiri Ntagatifu. Bahe ubwenge nyabwenge, bagire ubugabo bwo kwiyumanganya, bityo bogeze ikuzo ryawe, ingoma yawe bayigwize mu mitima y’abantu. Nibatubere urugero rw’urukundo rudatezuka, bityo bayobore abakwemeye bayobore abakwemeye inzira y’ubugingo bw’iteka. Amen.
Mariya, mugabekazi w’intumwa, udusabire.
