Dukomeze kugendera hamwe tumurikiwe na Roho Mutagatifu: Paruwasi Mwamikazi w’Intumwa yasubukuye imirimo ya sinodi icyiciro cya kabiri

Uyu munsi muri Paruwasi Mwamikazi w’Intumwa ya Nyamata habaye igikorwa cyo gusubukura imirimo ya Sinodi icyiciro cya Kabiri. Aho abakristu bahagarariye abandi mubyiciro bitandukanye baganiriye ku bibazo bya Sinodi. Iri huriro ryari ririmo Abagize inama Nkuru ya Paruwasi yose, Inama Ncungamutungo, Abayobozi b’amakomisiyo n’abari muri Komite zabo, abayobozi n’imiryango ya action gatolika, abayobozi b’amasantarari na Komite z’amasantarari, abayobozi b’impuzamiryangoremezo n’imiryangoremezo yose igize Paruwasi, Abahagarariye ingo z’Abihayimana n’Abasaseridoti.

Iyo nteko ya Sinodi yashubije ibibazo mu matsinda anyuranye yagiye ahuriramo: abanyamategeko n’abakora mu nzego bwite za leta n’izubushakashatsi, abakora mu nzego z’ubuzima n’amavuriro, abakora mu nzego z’uburezi n’abarimu, abihayimana, abapfakazi, abatandukanye n’abo bashakanye cyangwa batakiri kumwe n’ibindi byiciro byabari baje muri iri huriro rya Paruwasi.

Iyi nteko yabanjirijwe n’inama yari iyobowe na Padiri Mukuru wa Paruwasi François NSANZABACU, havugwa ku ngingo nkuru zikurikira: Iteganyabikorwa rya Arikidiyosezi ry’imyaka itanu n’igitabo rikubiyemo, kurihuza n’irya Paruwasi ry’imyaka itanu kugira ngo habashe gukorwa no ku rwego rwa Paruwasi igitabo kigendeye kuri iryo teganyabikorwa ryigihe kirekire kandi kikazajya cyifashishwa mugutegura iteganyabikorwa rya buri mwaka. Ingingo ya kabiri yavugaga ku mishinga y’Ikenurabushyo rya Paruwasi mu mirongo migari ndetse n’imishinga y’iterambere rya Paruwasi irimo ibikorwa nk’ishingwa rya Paruwasi Musenyi n’ishingwa rya Paruwasi ya Ntarama zombi muri iyi myaka ibiri iri imbere 2024 na 2025, havugwa n’indi mishinga migari ya Paruwasi hazazamo kuvugurura za Kiliziya zimwe na zimwe ndetse n’uko Paruwasi yagira inzu mberabyombi ijyanye n’igihe bitarenze 2026. Ku ngingo y’ikenurabushyo Padiri Mukuru yagarutse kuri yubile y’impurirane ya 2025 aho tuzizihiza imyaka 2025 y’Ugucungurwa kwacu n’imyaka 125 twakiriye Inkuru Nziza noneho 2026 tukizihiza yubile y’imyaka 50 ya Arikidiyosezi ya Kigali, havuzwe uburyo izi yubile zateguwe ku rwego rw’Inama y’Abepiskopi no ku rwego rwa Arikidiyosezi n’uburyo iwacu muri Paruwasi zakwizihizwa kuva ku rwego rwa Paruwasi kugera mu miryangoremezo.

 

Padiri François NSANZABACU

Padiri Mukuru wa Paruwasi Mwamikazi w’Intumwa/Nyamata

Leave a Reply

Your email address will not be published. Required fields are marked *