Arkiyepiskopi wa KIGALI, Nyiricyubahiro Antoine Cardinal KAMBANDA, mu gitambo cy’Ukaristiya yahaturiye, kuri iki cyumweru tariki ya 28/12/2025, ku munsi mukuru w’urugo Rutagatifu rw’i NAZARETI, yatangije ku mugaragaro urugendo rwa Yubile ya Arkidiyosezi ya KIGALI y’imyaka 50 imaze ishinzwe mu birori byabereye muri Paruwasi ya Sainte Famille.
Isanganyamatsiko yaherekeje kwizihiza umunsi mukuru w’urugo Rutagatifu rw’i NAZARETI igira iti
”UMURYANGO URINZWE KANDI UYOBOWE N’IMANA”.
Naho insanganyamatsiko izaherekeza uyu mwaka wa Yubile ya Arkidiyosezi ya KIGALI igira iti “URUGO IGICUMBI CY’IYOGEZABUTUMWA N’AMIZERO YA KILIZIYA “.
Ibi, birori byahuriranye no kwizihiza umunsi mukuru wa Paruwasi ya Sainte Famille, kuko iyi Paruwasi yaragijwe urugo Rutagatifu rw’i NAZARETI (Rugizwe na Yezu, Bikira Mariya na Yozefu).
Imiryango 3 ya Paruwasi Sainte Famille kandi yizihije Yubile y’imyaka 25 imaze ihanye Isakramentu ry’Ugushyingirwa, inahabwa Certificates y’urwibutso rwa Yubile.
Nyiricyubahiro Antoine Cardinal KAMBANDA, Arkiyepiskopi wa KIGALI, yatangaje ko muri uyu mwaka wa Yubile hifuzwa ko hazashyirwa imbaraga mu ikenurabushyo ry’umuryango, nk’uko n’insanganyamatsiko ibishimangira.
”Muri uyu mwaka wa Yubile, nifuje ko twashyira imbaraga mu ikenurabushyo ry’umuryango. Mutagatifu Papa Yohani Pawulo wa II, mu nyandiko ye ku muryango, Familiaris Consortio, yasabye Kiliziya gushyira imbaraga mu kubaka ingo nkirisitu, kuko “Ejo hazaza h’iyogezabutumwa hashingiye cyane kuri Kiliziya nto yo mu rugo”. Ni muri urwo rwego twahisemo intego izaduherekeza uyu mwaka wa Yubile, igira iti ” Urugo, igicumbi cy’iyogezabutumwa n’amizero ya Kiliziya””.
Nyiricyubahiro Antoine Cardinal KAMBANDA, yavuze kandi ko hifuzwa ko Kiliziya nto yo mu rugo iba koko igicumbi cy’umuhamagaro, kuko muri Kiliziya nto yo mu rugo, ari ho hashingiye umuhamagaro.
”Kiliziya nto yo mu rugo nibe koko igicumbi cy’umuhamagaro. Muri Kiliziya nto yo mu rugo, ni ho hashingiye umuhamagaro. Umuhamagaro ukenera gushyigikirwa, gusobanurwa, kugira urumuri no kugaburirwa n’uburere mbonezamana. Ababyeyi babe abafasha b’ingabire y’ubutore bw’Imana mu mihamagaro itandukanye. Urugo rufite inshingano zo gushyigikira umuhamagaro wa buri wese mu bawugize no kumufasha guhitamo neza, mu bushishozi, aho Nyagasani amubamagarira. Ufite igitekerezo cyo kwiyegurira Imana ashyigikirwe, kandi aherekezwe by’umwihariko, aho kumuca intege. Paruwasi, nk’umuryango w’ingo z’abakristu ifite inshingano yo guherekeza no kuba hafi imiryango kugira ngo ikenurabushyo ry’umuhamagaro ryitabweho”.
Yakomeje avuga ko hifuzwa Kiliziya umuryango w’Imana ugendera hamwe w’Arkidiyosezi ya KIGALI. Asaba ko muri uyu mwaka wa Yubile bashyira imbaraga mu ikenurabushyo rigendera hamwe, riherekeza ibyiciro byose bigize umuryango.
Avuga ko umuhamagaro wo gushinga urugo ukwiye gutegurwe hakiri kare, mu rugo no mu mashuri, mu myaka yo kurambagiza no kurambagizwa, n’amezi abanziriza Isakramentu ryo gushyingirwa. Abageni bitegure neza, bashyigikirwe n’imiryango yabo, kandi bategurwe igihe gihagije, byibura amezi atandatu, kugira ngo bamenyane kandi bakure mu rukundo.
Arkiyepiskopi yavuze ko ubuzima bukwiye kurindwa icyabuhungabanya, bwubahwe, bwakirwe, burengerwe na bose kuva umwana agisamwa, nk’uko: Nyagasani agira ati “Ntarakuremera mu nda ya nyoko nari nkuzi, naakwitoreye utaravuka” (Yer 1,5). Ingo zifashwe kugana service y’usugire bw’ingo, ibafasha kugera ku mbyaro bifuza, kandi bishingiye, hakoreshejwe uburyo bwo guteganya imbyaro bwa kamere, kuko bwubaha ubuzima bukaba butifitemo umugambi wo gukumira cyangwa kwica ubuzima.
Urugo rube igicumbi cy’uburere bwuzuye bw’abana. Ababyeyi bahore bari maso, bashishikazwe cyane no kumenya ubuzima bw’abana babo, iyo bari mu rugo n’iyo bari ahantu hatandukanye habunganira mu kurera: Ishuri, Paruwasi, Amahuriro y’abana, n’ahandi.
Yabasabye gushyiraho kandi bakanashyigikira amahuriro y’ingo n’isangirabuzima bikorerwa mu matsinda y’abakristu yita ku muryango, kuko bahura bagahanana, bakagirana inama, kandi bagafasha abafite ibibazo gushaka umuti, cyane cyane bibanda ku bari mu myaka ya mbere y’ubuzima bw”abashakanye.
Gahunda yo gusura urugo ku rundi, bikozwe n’Abapadiri ba Paruwasi, ikomeze gushyirwamo imbaraga, kuko hari benshi bahagirira amahirwe yo kugarukira Imana cyangwa bakongera kwiyunga mu rugo n’umuryango mugari.
Muri uyu mwaka kandi bazarusheho kwigira ku rugo rw’abagaragu b’Imana Sipiriyani RUGAMBA na Daphroza MUKANSANGA kwihangana, ubudaheranwa, no guhangana n’ibibazo bahura na Yezu muri Ukaristiya.
Kuri uyu munsi, Arkiyepiskopi yanatangaje ko imiryango y’Impuhwe z’Imana yafunguwe muri Yubile y’impurirane yasojwe izakomeza gufungurwa, kugira ngo abakristu bashobore kuharonkera Indulgensiya zishyitse.
Urugendo rwa Yubile y’imyaka 50 ya Arkidiyosezi ya KIGALI ruzasozwa tariki ya 05/12/2026. Arkidiyosezi ya KIGALI yashinzwe tariki ya 10/04/1976 ku cyemezo cya Nyirubutungane Mutagatifu Papa Pawulo wa 6, wari umushumba wa Kiliziya Gatolika ku isi muri icyo gihe, wagabanyijemo kabiri icyari Arkidiyosezi ya KABGAYI.
