Muri G.S CYANIKA(Saint Justin), iherereye muri Paruwasi ya MUNANIRA, kuri uyu wa gatanu tariki ya 30/05/2025, hizihirijwe ibirori byo gusoza icyumweru cy’uburezi Gatolika ku rwego rwa Arkidiyosezi ya KIGALI, cyatangiye tariki ya 26/05 kikazageza tariki ya 01/06/2025, byahuje ibigo by’amashuri 138, byo hirya no hino muri Arkidiyosezi.
Arkiyepiskopi wa KIGALI, Nyiricyubahiro Antoni Cardinal KAMBANDA, ni we watuye igitambo cy’Ukarisitiya cyabimburiye ibi birori byo gosaza icyumweru cy’uburezi Gatolika, anatangiramo amasakramentu ku banyeshuri n’abarezi 10 n’impinja 2.
Ibi birori kandi byitabiriwe n’abaihaye Imana batandukanye, abayobozi mu nzego bwite za leta, Police n’abandi bayobizi mu nzego z’uburezi zinyuranye.
Wabaye umwanya mwiza wo guturira hamwe igitambo cy’Ukarisitiya mu rwego rwo gushimira Imana, bazirikana ku Burezi n’uburere bukeshwa amashuri Gatolika, byose babitura Nyagasani, banazirikana uburezi muri rusange muri Arkidiyosezi ya KIGALI.
Muri ibi birori byo gosaza icyumweru cy’uburezi Gatolika ku rwego rwa Arkidiyosezi ya KIGALI, habayemo n’igikorwa cyo kuvuza inzogera(Ring The Bell) cy’ubukangurambaga kuburezi budaheza, cyateguwe na CARITAS ya Arkidiyosezi ya KIGALI, mu rwego abaturage bose kujyana abana bafite ubumuga mu mashuri, kuko umubare munini wabo utarajyanwa mu mashuri.
Ibirori byo guhimbaza iyi cyumweru cy’uburezi Gatolika byaherekejwe n’insanganyamatsiko igira iti “TURANGAMIYE KRISTU, ISHURI RYACU RIBE IGICUMBI CY’AMIZERO, UBUVANDIMWE N’AMAHORO”. Ikaba ari Insanganyamatsiko ifitanye isano n’insanganyamatsiko yo kwizihiza Yubile z’impurirane Kiliziya yatangiye urugendo rwayo rwo kuyizihiza mu byiciro binyuranye bya Kiliziya.
Ni icyumweru kandi, gifite isanganyamatsiko ihoraho igira iti “KILIZIYA GATOLIKA MU GUTANGA UBURERE BUHAMYE: Turere umwana ushoboye kandi ushobotse”.
Iki cyumweru cy’uburezi Gatolika ku rwego rwa Arkidiyosezi gisojwe cyaranzwe gutanga hirya no hino depliat ivuga ibikorwa by’ingenzi bizakorwa, babishyikiriza ibigo na Paruwasi, hakozwe Noveni yo kwitegura iki cyumweru cy’uburezi, kizihirijwe mu bigo by’amashuri ku rwego rwa Paruwasi kuva tariki ya 19/5 kugeza kuri 26/05/2025. No kuva tariki ya 26/05 kugeza kuri 01/6/2025, kiri kwizihizwa ku rwego rwego rwa Arkidiyosezi.
Arkiyepiskopi wa KIGALI, Nyiricyubahiro Antoni Cardinal KAMBANDA, yavuze ko uburezi baburebana amaso y’ukwemera, ko kurera umwana ari ukumurerera Imana, asaba abarezi kubarera neza.
”Uburezi rero tuburebana amaso y’ukwemera. Umwana turera ni umwana Imana ikunda, ibereye umubyeyi ndengakamere, kandi ifitiye umugambi, ikaduha ubutumwa bwo kumurera tumutegura, kuburyo azasohoza neza ubutumwa Imana yamugeneye, Imana yamuremeye. Barezi rero, kurera ni ukurerera Imana. Niyo mpamvu uburezi mu butumwa bwa kiliziya uburezi ari ubutumwa by’ingenzi bugize ubutumwa bwa kiliziya”.
Yongeyeho ko muri uyu mwaka hizihizwa Yubile y’impurirane: Imyaka 2025 umukiza avutse ku isi, impaka 125 iyo nkuru nziza y’umukiro igeze mu RWANDA, ko ari na Yubile y’uburezi, kuko abogezabutumwa mu kwigisha ivangili byajyaniraga no kwigisha gusoma no kwandika, byajyanaga n’amashuri. Amashuri yatangijwe na kiliziya mu RWANDA, uburezi bw’amashuri bwatangijwe na kiliziya mu RWANDA. Muri iyi myaka rero 125 kiliziya imaze igeze mu RWANDA, ni na Yubile y’uburezi mu mashuri, kuko uburezi bw’amashuri bwatangiranye na kiliziya mu RWANDA.
Abana kandi baba batandukanye. Cardinal KAMBANDA, yongeyeho ko abarezi barabibona mu ishuri ko abana batandukanye mu mpano. Impano umubyeyi atarazi, yewe impano nawe adafite, n’abavandimwe badafite, ugasanga wa mwana yifitemo impano z’umwihariko, kubera ubutumwa n’umugambi Imana imufitiye. Uho uzasanga ari umusizi, ni umunyabugeni, azi gushushanya, ukabona ni umuririmbyi, umuziki uramubangukira, guhimba indirimbo no gucuranga, ukabona azi imibare, iramubangukira, mu gihe abandi bari gushakisha, akabangukirwa n’indimi, mu gihe abandi zibagora, abarezi rero babibona bagagasha wa mwana kugira ngo izo mpano, ayo matarenta ashobore kujya ahagaragara no kubyazwa umusaruro. Hari ibyo ababyeyi babanza kubona ariko cyane cyane mu ishuri. Hamwe n’abandi niho impano zigaragarira kurushaho.
Cardinal KAMBANDA, yavuze ko uburezi bufite uruhare rukomeye mu gushyira ahagaragara impano abana bifitemo zikabyazwa umusaruro, zikagirira abandi akamaro.
”Uburezi busohora za mpano umwana afite burazisohora bukazishyira ahagaragara, bukaziyobora mu bikorwa by’ingirakamaro n’ubutumwa wa mwana ategurirwa. Zikabyazwa umusaruro mu guhereza abandi, mu kugirira akamaro abandi”.
Iki cyumweru cyagiye kizihirizwa mu bigo bitandukanye, bikagenda bisimburana mu turere tw’icyenurabushyo dutandukanye. Uturere tw’icyenurabushyo tukaba twari twarazengurutswe mu kutwizihirizwamo iki cyumweru ku rwego rwa Arkidiyosezi, ariko nyuma yaho utu turere tubaye 6 aho kuba 5 twahozeho, akarere gashya k’icyenurabushyo ka RWANKUBA ko bakaba bari batarakagezemo, bikaba ari muri urwo rwego aka karere katoranyijwe kwizihirizwamo iki cyumweru uyu mwaka. Hagatoranywa GS CYANIKA yo muri Paruwasi nshyashya ya MUNANIRA.
Ku rwego rwa Arkidiyosezi, gusoza iki cyumweru wabaye umwanya mwiza wo gusubiza amaso inyuma, bakareba uko uburezi muri rusange bwagenze mu myaka 5 ishize. Iki cyumweru kandi cyaranzwe n’ibikorwa bya CARITAS, aho bashishikarije abana mu mashuri, bafasha bagenzi babo, aho no kuri uyu munsi hari abana bafashijwe na CARITAS ya Arkidiyosezi ya KIGALI, mu bigo by’amashuri nka GS BUSHONYI mu karere ka BUGESERA abana bafashanyije hagati yabo, no mu bindi bigo bitandukanye.
Habayeho kandi igikorwa cyo gucengera insanganyamatsiko bahawe, bakayumva, bakayisobanurirwa, hari isengesho batuye abana, aho kugeza ubu abana bose bo mu bigo by’amashuri barizi. Ni isengesho rijyana n’iki cyumweru cyo guhimbaza icyumweru cy’uburezi Gatolika. Habayeho kandi igikorwa kigizwe n’imikino n’imyidagaduro hirya no hino mu bigo, no mu ma Paruwasi, byose bijyanye n’insanganyamatsiko bihaye.
N’ubwo mu myaka yabanje hagiye hibandwa mu guhemba abanyeshuri bitwaye neza, babaye indashyikirwa kurenza abandi mu byiciro binyuranye hagahembwa: Abahimbye umuvugo n’ indirimbo bijyanye n’insanganyamatsiko , hagahembwa n’ibindi byiciro. Muri uyu mwaka 2025 habayeho umwihariko wo guhemba ababaye abarezi Gatolika bagiye mu kiruhuko cy’izabukuru.
Kiliziya Gatolika iza ku isonga mu gutanga uburere buhamye. Kuri ubu mu myaka iri imbere ifite intego yo gukomeza kurera umwana ushoboye kandi ushobotse. Ibi bikaba bisobanuye byinshi: Umwana utsinda neza amasomo, umwana ufite uburere buhamye, bwuzuye. Kuko Kiliziya yiyemeje kurera umuntu wuzuye.
Amashuri Gatolika ya Arkidiyosezi ya KIGALI arebwa n’iki gikorwa cyo gusoza icyumweru cy’uburezi Gatolika arenga 138, arimo: Amashuri y’incuke, abanza, ayisumbuye, Amashuri y’ubumenyi bw’ibanze bw’imyaka 9 na 12, harimo kandi Boarding schools ndetse n’ishuri rikuru ry’uvuzi ya Ruli Higher Institute of Health (RHIH).
Bimwe mu bigo byitabiriye gusoza icyumweru cy’uburezi Gatolika ku rwego rwa Arkidiyosezi ya KIGALI:
Zone MASAKA harimo: GS KABUYE, GS NDUBA, GS SHA, GS MUSAVE. Zone KICUKIRO: GS KICUKIRO, GS KINYINYA, GATENGA TSS. Zone Saint Michel: GS KABUYE, College Saint Andre, LDK. Zone NYAMATA: EP RUDUHA, NDAMA TSS. Zone RULINDO: ES GASIZA, GS SHYORONGI. Zone RWANKUBA: GS KARUSHASHI GS CIM RWANKUBA, GS MUNYANA, GS CYANIKA, n’ibindi.
G.S CYANIKA(Saint Justin) ryizihirijwemo ibirori byo gusoza icyumweru cy’uburezi Gatolika ku rwego rwa Arkidiyosezi ya KIGALI, riherereye mu ntara y’Amajyaruguru, mu karere ka GAKENKE, mu murenge wa COKO, akagari ka NYANGE, umudugudu w’AGASEKE.
Iri shuri GS CYANIKA ryatangijwe na Padiri SUMBILI Gaudefroid, ahagana mu mwaka 1950. Rikaba riri no kwizihiza Yubile y’imyaka 75. Kuri ubu umuyobozi waryo ni Padiri Theoneste RUKUNDO.
Kuri ubu, GS CYANIKA ifite ikiciro cy’amashuri y’incuke kirimo abana 360, abanza kirimo abana 970, n’ikiciro cy’amashuri yisumbuye kirimo abana 268. Rifite abanyeshuri bose hamwe 1606, bafashwa n’abarezi 50.
