Paruwasi Munanira

Ejo ku cyumweru tariki ya 25 Nzeri 2022, Arkidiyosezi ya Kigali izibaruka paruwasi ya 37, paruwasi Munanira, yitiriwe Bikira Mariya Umubyeyi wa Kiliziya. Paruwasi Munanira izabyarwa na Paruwasi  ya Ruli. Iyi paruwasi nshya izaba igizwe   n’amasantarari 3 ariyo: MUNANIRA ,MBIRIMA NA GITONDE . Igizwe n’abakristu  8564.

 

Igitekerezo  cy’uko i Munanira    haba Paruwasi  si icya vuba aha ,kimaze igihe . Umurimo w’iyogezabutumwa  i Munanira watangiye  mu mwaka w’i  1930  ubwo hatangijwe   ishuri rya gatigisimu n’umukateshisite  wari uturutse muri Misiyoni ya Rulindo witwaga Tomasi  BWAHI, nyuma ye hakurikira ho uwitwa Yohani  KAVARUGANDA. Kuva icyo gihe umubare w’abigishwa wakomeje kwiyongera ari nako abakristu biyongera , ariko kuko Paruwasi yari kure, imyumvire n’imibereho ishingiye ku muco nabyo  byabaye inzitizi.

Imwe mu myaka n’amataliki y’ingenzi i Munanira

1930: Nibwo umukateshiste wa mbere yasesekaye I Munanira aturutse muri misiyoni ya Rulindo .

1948: Nibwo santarari Munanira yashinzwe .Yatangiriye ahitwa Munanira mu mudugudu wa Karoli  icyo gihe yari inzu y’ibyatsi

12/10/1968:  Nibwo  Santarari yimuwe ikava aho i Munanira mu mudugugu  wa Karori  yimurirwa aho ubu inyubako iri. Icyo gihe  hari Nyiricyubahiro Mgr Andreya Perodin.

1971: Hatangiye igikorwa cyo kubaka Kiliziya ya Santarari yubakishije amatafari ahiye yari yubatse nk’ishuri ishyigikiwe n’inkingi imbere.

Ku wa 24/09/1972:Nyiricyubahiro Mgr Andreya Perodin yongeye  gufata ubwato yambuka Nyabarongo aje gusura abakristu asanga baratangiye kwiyongera. Icyo gihe yasize  ababwiye ko nibakomeza kwiyongera azabaha Paruwasi kugira ngo urugendo rugabanuke.

Ku wa 27/05/1978: Nyiricyubahiro Vicent NSENGIYUMVA  yasuye Munanira .Aganira  n’abakristu Icyo gihe bamusabye ivuriro .Ntiyatindiganyije  yahise aribemerera.

Ku wa 11/08/1999: Nyiricyubahiro Mgr Tadeyo NTIHINYURWA   (Uri mu kiruhuko ) yasuye Munanira  aje gutaha ivuriro hanatangizwa   ubutumwa bw’umuryango w’ababikira “Inshuti z’abakene”

Kuva icyo gihe abakristu bakomeje kwiyongera kandi bagaragaza ishyaka bafitiye Kiliziya .

Ku wa 05.06.2015 : Nibwo Nyiricyubahiro Tadeyo NTIHINYURWA wari Arkiyepiscopi wa Kigali yagarutse i Munanira aje gutaha inyubako ya Kiliziya yavuguruwe . Mu ijambo rye asubiza icyifuzo cy’umukristu wavuze ahagarariye abandi wasabaga ko Munanira yaba Paruwasi yari yabijeje ko azabishyira muri gahunda no mu nyandiko kugira ngo  igihe azaba agiye mu kiruhuko cy’izabukuru  icyo gitekerezo kizitabweho n’abazamusimbura.

Ishyirwa  mu bikorwa ry’igitekerezo  cy’imyiteguro y’ishingwa rya Paruwasi Munanira cyatangijwe   mu mpera z’umwaka  wa 2018 ubwo muri iyo santarari hasonzwaga urugendo rwo kwakira no kuzirikana ubutumwa bwa Nyina wa Jambo  icyo gihe  uwari Padiri mukuru wa Paruwasi ya Ruli Gaudiose MPAWENAYO nyuma yo kuganira n’abakristu no kujya  inama n’ abahagarariye abandi muri iyo santarari biyemeje gutangira umushinga w’inyubako y’icumbi  ry’abapadri kuko inyubako ya Kiliziya ihari babonaga ihagije  yakira abakristu hagati ya 1500 na 2000.  Twibutse ko inyubako ya Kiliziya dufite ubu yatashywe ku mugaragaro na Nyiricyubahiro  Mgr Tadeyo NTIHINYURWA  ku wa 05.06.2015 wari Arkiyepiskopi wa Kigali (ubu akaba ari mu kiruhuko cy’izabukuru).

Muri iyi Paruwasi nshya ya Munanira mu mbibi zayo havukamo abapadri 3, umufureri 1, ababikira 12 , abafaratiri 3, umuseminari muto 1.

Icumbi ry’abapadiri ba paruwasi Munanira

Arkiyepiskopi Antoine Karidinali Kambanda yasuye icumbi ry’abapadiri rya paruwasi Munanira

Arkiyepiskopi aganira n’abakristu ba paruwasi Munanira

Ifoto y’urwibutso

Umwanditsi

Jean Paul NKUNDAMAHORO

Padiri mukuru wa Paruwasi Ruli

 

Leave a Reply

Your email address will not be published. Required fields are marked *

Post comment