Paruwasi Rwankuba

Tariki 15 kanama 2022 ku munsi mukuru w’asomusiyo, paruwase ya Rwankuba yaragijwe Umutima Utagira Inenge wa Bikira Mariya yizihije yubile y’imyaka 75 imaze ishinzwe. Ibi birori byitabiriwe na Nyiricyubahiro Antoine Karidinali  Kambanda, Arkiyepiskopi wa Kigali, hamwe n’abasaseridoti benshi cyane cyane abavuka n’abakoreye ubutumwa muri paruwasi ya Rwankuba. Inzego bwite za leta zari zihagarariwe na Nyakubahwa Dancille Nyirarugero guverineri w’intara y’amajyaruguru hamwe n’abandi bayobozi banyuranye.  Iyi paruwasi iherereye mu murenge wa Rushashi, akarere ka Gakenke mu ntara y’amajyaruguru. Paruwasi Rwankuba  igizwe n’amasantarali 7 arimo abakiristu basaga 25043. Mu gutegura iyi Yubile hegerewe amatsinda anyuranye y’abakiristu : abana, abihayimana, urubyiruko, abalayiki bakora ubutumwa muri Kiliziya,. Ikindi kandi n’abakristu baguye baregerewe kugirango bagaruke nk’uko padiri mukuru w’iyi paruwasi Noel Banzi, yabigaragaje. Insanganyamatsiko ya yubile ni « Menye kandi nkunde Kiliziya ndimo ».

Mu gitambo cya Misa cyabimburiye ibi birori kigahimbazwa na Nyiricyubahiro Antoine Karidinali Kambanda, hahimbajwe n’umunsi mukuru w’Asomusiyo ari nawo amasomo ya liturujiya yagarukagaho. Mu nyigisho yatanze, Karidinali  yagarutse ku byishimo by’uwo munsi wa Bikira Mariya wajyanywe mu ijuru. Ijyanwa mu ijuru rye riduha ukwizera ko natwe nyuma y’imiruho yo ku isi tuzataha mu ijuru. Twishimira nanone ko dufite umuvugizi imbere y’Imana.  Umushumba w’Arkidiyosezi yakomeje inyigisho ye yibutsa ko yubile ari igihe cyo kugarukira Imana n’umuryango wayo. Ibyo bijyana no gusaba imbabazi, kwiyunga no kwakira amateka kuko kujya kure y’Imana bigira ingaruka mbi nyinshi zirimo n’ibibazo bigaragara mu miryango muri iki gihe.

Mw’ijambo rye, umukristu uhagarariye abandi Diomène Mpatswenumugabo yagarutse ku mateka ya paruwasi Rwankuba kuva yashingwa ku wa 15 kanama 1947, ibyawe na misiyoni ya Rulindo, ikaza nayo kwibaruka paruwase 4 arizo : Ruli, Muhondo, Munyana na Mbogo. Muri icyo gihe cyose kandi yashoboye kubona abapadri basaga 20 bayivukamo. Naho nyakubahwa guverineri w’intara y’amajyaruguru mw’ijambo yavuze yashimiye ubufatanye buri hagati ya leta na Kiliziya Gatolika bwanagaragariye mu bikorwa byo kurwanya imirire mibi no kurwanya amakimbirane mu ngo. Yongeye gusaba ko bwakomeza bukagera no mu kurwanya isuku nke, imiturire idakwiye no guta ishuri ku bana. Yasabye abari bateraniye aho bose kwitabira neza ibikorwa by’ibarura ndetse n’ibyo kurwanya isuri. Mw’ijambo rye Nyiricyubahiro Karidinali yongeye kwerekana ishingiro ryo guhimbaza yubile nk’uko tubisanga mu byanditswe bitagatifu cyane cyane mu byo Uhoraho yasabye Musa. Nyiricyubahiro  yibukije kandi ko kuba iyi yubile yahuriranye n’umunsi w’Asomusiyo bifite ishingiro kuko muri Arikidiyosezi ya Kigali, gukunda Umubyeyi Mariya ari umuco wo kuva kera kuko paruwasi ya mbere yahashinzwe(Rulindo) ari we yaragijwe. Ubu paruwasi zirenga 14 muri Kigali zikaba zimwisunga. Yongeye gushimira ubutumwa bwakorewe muri iyi paruwasi ya Rwankuba maze asaba ko abayigize bareba imbere bagategura ahazaza maze bakazizihiza imyaka 100 mu byishimo byinshi..

Faratiri Ananie Hafashimana

Paruwasi Rutongo

Leave a Reply

Your email address will not be published. Required fields are marked *

Post comment