ARKIDIYOSEZI YA KIGALI YAHAHIMBARIJE YUBILE Y’URUBYIRUKO MU MYAKA 50 ARKIDIYOSEZI YA KIGALI IMAZE ISHINZWE

Arkidiyosezi ya KIGALI, kuri iki cyumweru tariki ya 22/11/2026, ku munsi mukuru wa Kristu Umwami, umunsi mpuzamahanga wahariwe urubyiruko, muri Paruwasi ya RUHUHA, yahahimbarije Yubile y’urubyiruko mu myaka 50 Arkidiyosezi ya KIGALI imaze ishinzwe (1976 – 2026), mu gitambo cy’Ukaristiya cyatuwe na Arkiyepiskopi wa KIGALI, Nyiricyubahiro Antoine Cardinal KAMBANDA.

‎Insanganyamatsiko y’urubyiruko igira iti ” NI MUKOMERE ISI NARAYITSINZE”, Yh16,33.

‎Insanganyamatsiko ya Yubile igira iti “URUGO, IGICUMBI CY’IYOGEZABUTUMWA N’AMIZERO YA KILIZIYA”.

Arikiyepiskopi, mu butumwa bwe abuhuza n’umunsi mukuru wa Kristu Umwami, yabanje kubasobanurira uby’uyu munsi mukuru, anasobanura Umwami uyu mwami uvugwa.

“Bavandimwe Kristu ni Umwami w’isi n’ijuru. Ni umwami w’abami bose. Uyu munsi icyumweru cyanyuma gisoza umwaka wa liturjiya twizihiza, Kristu Umwami uhebuje bose na byose. Kugirango twumve iby’Imana, umubano wacu n’Imana, n’ukuntu Imana idukunda ikatwitaho, Bibiliya ikoresha ingero zibyo abantu bazi babona mu buzima bwabo. Ijambo ry’Imana uyu munsi rirakoresha ingero 2: Umushumba mwiza wita ku bushyo bwe n’umwami wita ku buzima bw’abantu ayobora”.

Yasobanuye ko umuhanuzi Ezekieli we agira ati, “Nyagasani Uhoraho aravuze ati «Dore jye ubwanjye ngiye gukenura amatungo yanjye kandi nyiteho. 12Uko umushumba yita ku matungo ye igihe aba ari hagati y’intama zibyagiye, nanjye ni ko nzita ku ntama zanjye, nzivane ahantu hose zatatanirijwe ku munsi w’ibihu n’umwijima… nzazibyagiza ziruhuke. 16Nzashakashaka iyazimiye, ngarure iyari yatannye, iyakomeretse nyomore, naho iyari irwaye nyondore, ibyibushye ikanagira ubuzima bwiza nkomeze kuyitaho. Nzaziragira zose nkurikije ubutabera.” Ibi bikaba bigaragaza uko Nyagasani yita ku bantu no kurusha uko bo babizi cyangwa bashobora kubyumva. Uyu mushumba mwiza wahanurwaga ni Yezu Kristu umushumba mwiza.

Ishusho ya kabiri ni ishusho y’umwami, nawe ni umuntu wita ku bantu be ashinzwe ngo bagire ubuzima bwiza.

Uyu munsi, mu RWANDA akaba ari naho bibuka Umwami RUDAHIGWA amaze kumenya Imana kwemera no kubatizwa Charles Leo Pierre, mu gushakira icyakiza abanyarwanda, u RWANDA yarutuye Kristu Umwami ubakunda kandi ushobora byose, aho agira ati, “Nazanywe no kugirango bose bagire ubuzima busagambye.”

Uyu munsi ni isabukuru ya 80. Mu isengesho atura u RWANDA Kristu umwami, asabira abanyarwanda kubana kivandimwe abagabo, abagore, ingo, abatware ngo bose bose bayoboke Kristu batunganire Imana. Umwami, Kristu Umwami akaba ari urugero ruhebuje, kuko mu kwita ku bantu umuntu wambere ni umwami. Kristu si umwami w’imisozi ni Umwami w’imitima ni umwami w’urukundo. Ingoma ye ni ingoma y’urukundo.

Intebe y’ubwami bwa Kristu ni ku musaraba. Ikamba rye ni umusaraba. Ariko ibi, bikaba bisa n’ibihabanye, ariko Kristu ntabwo ari umwami nk’abami b’isi. Imana ni urukundo, Kristu ni umwami w’urukundo nirwo ategekesha abantu nirwo akoresha mu kubayobora. Nkuko abivuga, “Nta rukundo ruruta urw’umuntu wemera guhara amagara ye agiriye abo akunda.” Ku musaraba niho agaragaza urukundo ruhebuje yakunze abantu.

Abantu bari barabaye ingwate n’imbohe z’urupfu yemera kwitanga ngo ababere igitambo abacungure ku ngoyi y’urupfu arubatsindire abasangize ubuzima bw’iteka. Nibyo Paulo Mt atangamo ubuhamya ati, “Kristu yazutse koko mu bapfuye, aba umuzukambere mu bapfuye bose. 21Nk’uko…bose boramye bitewe na Adamu, ni na ko bose bazasubizwa ubugingo biturutse kuri Kristu…26Umwanzi w’imperuka uzarimburwa, ni urupfu.”

Arkiyepiskopi, abihuza n’amasomo matagatifu uyu munsi bazirikanye mu gitambo cy’Ukaristiya (Ivanjili), yasobanuye ko nk’uko babyumvise, amwe mu magambo ye yanyuma Yezu Kristu yasigiye abantu, basigiye umurage w’urukundo guhuza urukundo rw’Imana n’urw’abavandimwe.

Yavuze ko hari igihe usanga umuntu yumvako akunda Imana cyane, ariko wareba imibanire ye n’abavandimwe ukabona abanira nabi abandi, we yumva akunda Imana gusa iby’abantu ari ibindi, agahemuka, akangana, akarwana, agatukana yarangiza akaza gusenga no gushimira Imana. Avuga ko umuntu adashobora gukunda Imana atabona n’amaso mu gihe adakunda umuvandimwe bari kumwe.

‎Ibi birori, byanitabiriwe na Padiri ushinzwe iyogezabutumwa ry’urubyiruko, Padiri Thadée NDAYISHIMIYE, n’abandi basaserdoti banyuranye barimo n’abashinzwe iyogezabutumwa ry’urubyiruko mu ma Paruwasi, abiyeguriye Imana banyuranye.

‎Byanitabiriwe kandi n’abayobozi mu nzego bwite za leta banyuranye, barimo umuyobozi ushinzwe amashuri abanza n’ayisumbuye mu karere ka BUGESERA, gaherereye mu ntara y’iburasirazuba, ndetse n’imbaga y’abakristu.

‎Arikiyepiskopi yanashyikrije ibihembo urubyiruko rwatsinze amarushanwa yateguwe mu minsi yabanje yagarukaga ku kwamamaza inkuru nziza hifashishijwe ikoranabuhanga (DIGITAL EVANGELIZATION). Hiyandikishije ari 46 bahemba 7.

Kuri uyu munsi mpuzamahanga wahariwe urubyiruko wizihijwe ku ncuro yawo ya 41, Arkiyepiskopi yanabagejejeho ubutumwa bwa Nyirubutungane Papa Leon wa 14 yageneye urubyiruko kuri uyu munsi.

Mu birori byo kwizihiza umunsi mukuru wa Kristu Umwami, wo wizihijwe hanazirikanwa isabukuru y’imyaka 80 ishize uwari umwami w’u RWANDA, Mutara wa III RUDAHIGWA atuye igihugu cy’u RWANDA Kristu Umwami. Icyo gihe hari mu mwaka 1946.

Urubyiruko kandi, ruri mu myiteguro yo kuzitabira ihuriro mpuzamahanga ry’urubyiruko rizabera i SEOUL, mu murwa mukuru w’igihugu cya KOREYA YA YEPFO (“SOUTH KOREA”), ku mugabane wa ASIA, kuva tariki ya 03 – 08/08/2027. Bakazaba bari kumwe n’umushumba wa Kiliziya Gatolika ku isi, Nyirubutungane Papa Leon wa 14. Bakazahahurira n’urundi rubyiruko ruzaba rwaturutse hirya no hino ku isi.

Arkiyepiskopi, akaba yasabye urubyiruko rutazabasha kujyayo kuko bisaba ubushobozi bwinshi, kuzifatanya n’abazaba bari yo bifashishije ikoranabuhanga, bagakurikirana ubutumwa bwose buzahatangirwa.

Umwanditsi: Adelphine UWONKUNDA.