Umuryango w’Abapalotini, kuri iki cyumweru tariki ya 06/09/2026 watangije ku mugaragaro umwaka wa Yubile y’imyaka 50 umuryango w’Ababikira b’Abapalotini umaze ugeze mu RWANDA (1977 – 2027), (“Jubilé d’Or des soeurs Pallottines”), ababikira 2 n’abapadiri 3 bawo bahimbaje Yubile y’imyaka 25 y’Amasezerano yo kwiyegurira Imana, Padiri 1 ahimbaza Yubile y’imyaka 25 y’Ubusaserdoti, Ababikira 3 n’abafratri 2 bakoze amasezerano ya burundu, mu birori byabereye muri Paruwasi yaragijwe Mutagatifu Visenti Pallotti / GIKONDO, ho muri Arkidiyosezi ya KIGALI, mu gitambo cy’Ukaristiya cyayobowe na Arkiyepiskopi wa KIGALI, Nyiricyubahiro Antoine Cardinal KAMBANDA.
Ababikira 2 n’abapadiri 3 bahimbaje Yubile y’imyaka 25 bamaze bakoze amasezerano yo kwiyegurira Imana ni: Mama Mariya Liberata NIYONGIRA na Mama Mariya Thérèse TEGERA, Padiri Ascension NKURIKIYIMANA, Padiri Désiré RUVAMWABO NZABONIMPA na Padiri Wenceslas TEGERA IYAMUREMYE.
Padiri 1 wahimbaje Yubile y’imyaka 25 y’Ubusaserdoti ni Padiri Jean-Pierre NSABIMANA MIHIGO.
Ababikira 3 n’abafratri 2 bakoze amasezerano ya Burundu ni: Mama Mariya Chantal MUKAMANA, Mama Mariya Grâce MUSABYIMANA na Mama Mariya Innocente MUKANDAGIJIMANA, Fratri Jean Bosco SIBOMANA na Fratri Christian MAPENZI NSENGIYUMVA.
Nyiricyubahiro Antoine Cardinal KAMBANDA, Arkiyepiskopi wa KIGALI, mu butumwa yahatangiye yavuze ko ibyo baje kwizihiza uyu munsi byose birahurira ku kwiyegurira Imana.
“Tuje gutangiza uyu mwaka wa Yubile y’ababikira b’abapalotini mu myaka 50 bamaze baje gukora ubutumwa mu RWANDA, hakaba na Yubile y’abasezeranye burundu y’abapalote n’abapalotine, hakaba n’amasezerano ya burundu n’amasezerano y’abato ya mbere. Izi Yubile z’impurirane rero zose zirahurira ku muhamagaro n’ubutumwa bwo kwiyegurira Imana, bushyirwa mu bikorwa binyuze mu masezerano uwiyeguriye Imana agirana n’Imana mu Kiliziya. Ibyo twizihiza byose birahurira kuri uku kwiyegurira Imana”.
Yavuze kandi ko Nyagasani Imana nk’umubyeyi ukunda abantu aba ashaka ko baba umuryango wa kivandimwe, wunze ubumwe nk’abana be bamwizihiye abere ye nk’umubyeyi.
Ikintu gikomeye kibabaza umubyeyi ni abana be baba babanye nabi, batumvikana, badakundana, baryana, bacikamo ibice. Ariko iyo bashyize hamwe, bakundana, umubyeyi biramushimisha, akabaha umugisha.
Agaruka ku byanditse bitagatifu, Arkiyepiskopi yavuze ko nk’uko Yezu abihishura mu ivanjili agira ati “niba babiri muri mwe ku isi bashyize hamwe ngo bagire icyo basaba bazagihabwa na Data uri mu ijuru. Kuko aho babiri cyangwa batatu bateraniye mu izina ryanjye mba ndi hagati yabo”.
Arkiyepiskopi wa KIGALI, yasobanuye ko kwiyegurira Imana ari uburyo bufasha abantu kubana kivandimwe bunze ubumwe nk’umuryango wizihira Imana.
“Kwiyegurira Imana ni uburyo bufasha abantu kubana kivandimwe bunze ubumwe nk’umuryango wizihira Imana. Kamere muntu yakomerekejwe n’icyaha cy’inkomoko ku buryo umuntu bitamworohera gutunganira Imana abana mu rukundo rwa kivandimwe n’abandi, ibi rero bikamukururira umuruho ndetse n’urupfu n’agahinda. Iyo abantu babanye nabi hagati yabo biba bibi”.
Ibi birori by’impurirane, byitabiriwe n’abandi bepiskopi bo mu RWANDA banyuranye bagera ku 8: umushumba wa Diyosezi ya KABGAYI, Nyiricyubahiro Musenyeri Bartazar NTIVUGURUZWA, umushumba wa Diyosezi ya KIBUNGO, Nyiricyubahiro Musenyeri Jean Marie Vianney TWAGIRAYEZU, umushumba wa Diyosezi ya BUTARE, Nyiricyubahiro Musenyeri Jean Bosco NTAGUNGIRA, umushumba wa Diyosezi ya GIKONGORO, Nyiricyubahiro Musenyeri Celestin HAKIZIMANA, umushumba wa Diyosezi ya RUHENGERI, Nyiricyubahiro Musenyeri Visenti HAROLIMANA, Arkiyepiskopi wa KIGALI, uri mu kiruhuko cy’izabukuru, Nyiricyubahiro Thedee NTIHINYURWA, umushumba wa Diyosezi ya KABGAYI, uri mu kiruhuko cy’izabukuru, Nyiricyubahiro Musenyeri Smaragde MBONYINTEGE, umushumba wa Diyosezi ya KABGAYI, uri mu kiruhuko cy’izabukuru, Nyiricyubahiro Musenyeri Anastase MUTABAZI, n’umushumba wa Diyosezi ya BYUMBA, uri mu kiruhuko cy’izabukuru, Nyiricyubahiro Musenyeri Servilien NZAKAMWITA.
Umwanditsi: Adelphine UWONKUNDA.
