Arkiyepiskopi wa KIGALI, Nyiricyubahiro Antoine Cardinal KAMBANDA, kuri wa Kabiri tariki ya 04/08/2026, nibwo yayoboye igitambo cy’Ukaristiya, yaturiye muri Paruwasi Cathédrale Saint Michel, ho muri Arkidiyosezi ya KIGALI, cyo gufungura ku mugaragaro inama ya mpuzamahanga ya “SIGNIS WORLD CONGRESS 2026” iri kubera mu RWANDA, muri Hotel Sainte Famille, , muri Arkidiyosezi ya KIGALI, ku ncuro yayo ya 8, kuva tariki ya 03 – 08/08/2026, ihurije hamwe abakora mu rwego rw’ itangazamakuru n’itumanaho rya Kiliziya baturutse mu bihugu birenga 40, byo ku migabane 5 y’isi. Ikaba ari ku ncuro ya mbere ibereye muri AFURIKA.
Mu rurimi rw’igifaransa, ifite insanganyamatsi igira iti “COMMUNICATION NUMÉRIQUE AU SERVICE DE L’HARMONIE CULTURELLE ET DU BIEN- ÊTRE ENVIRONMENTAL”.
Mu butumwa yabagejejeho mu ijambo rye ry’ikaze, yabagejejeho mbere ya saa 12h, Arkiyepiskopi yavuze ko iyi Kongere itanga amahirwe yo kongera kwibuka ubutumwa bw’Inama Nkuru ya Vatican II, bwahamagariraga abana ba Kiliziya bose gushyira hamwe imbaraga mu kwifatanya mu gikorwa rusange cyo gukoresha neza itumanaho mu bikorwa bitandukanye by’ubutumwa bwa gikristu.
“Iyi Kongere itanga amahirwe yo kongera kwibuka ubutumwa bw’Inama Nkuru ya Vatican II, bwahamagariraga abana ba Kiliziya bose gushyira imbaraga mu kwifatanya nta gutindiganya mu gikorwa rusange cyo gukoresha neza itumanaho mu bikorwa bitandukanye by’ubutumwa bwa gikristu, hakurikijwe ibihe n’imiterere y’ibikenewe”.
Inama Nkuru ya Vatican ya II yasabye ko hashyirwaho ibitangazamakuru bya Kiliziya Gatolika, hagashingwa ibigo bishinzwe itumanaho mu bihugu bitandukanye ndetse hakanatezwa imbere ubufatanye hagati yabyo binyuze mu mashyirahamwe y’abanyamwuga b’ibitangazamakuru Gatolika nka SIGNIS, ihurije hamwe abantu benshi muri iki gihe. Ibi, ni byo inyandiko ya Inter Mirifica ivuga mu ngingo zayo zo: 13, 21 na 22.
Akomeza avuga ko muri rusange ibitangazamakuru by’itumanaho byahaye Kiliziya amahirwe mashya yo gusohoza ubutumwa bwayo bwo kwamamaza Inkuru Nzizay a Kiliziya ku isi yose.
Binyuze mu ikoreshwa neza ry’ibi bitangazamakuru, Kliziya igira uruhare mu guteza imbere imibereho myiza ishingiye ku mahoro, ubuvandimwe, iterambere rirambye, kubahiriza agaciro ka muntu no gukwirakwiza indangagaciro za gikristu.
Kongere mpuzamahanaga ya SIGNIS itanga amahirwe akomeye yo gusuzuma intambwe Kiliziya imaze gutera mu gukoresha itumanaho mu iyogezabutumwa no kumenya aho hakenewe kongerwa imbaraga, kugira ngo ubwo butumwa burusheho gutanga umusaruro.
Yakoje avuga ko kandi, ari umwanya wo gutekereza ku ngaruka zishobora guterwa n’itangazamakuru risanzwe n’imbuga nkoranyambaga igihe bikoreshejwe nabi, ndetse no ku byago bishobora guteza umuryango mugari (“Society”).
Iyi Kongere ikurikiye itangazwa ry’urwandiko rwa Nyirubutungane Papa Leon wa 14, rwitwa Magnifica Humanitas, rushimangira akamaro ko kurinda agaciro n’umwihariko bya muntu muri iki gihe cy’ubwenge buhangano (Artificial Intelligence).
Arkiyepiskopi, yongeyho ko kuba intumwa zirenga 300 ziteraniye hano mu RWANDA bitanga ubutumwa bukomeye. Yavuze ko itumanaho nyaryo rishingiye ku bwenge no ku mutima bya muntu. N’ubwo itumanaho rifite uruhare rukomeye, ariko ko rikwiye gukomeza kuba igikoresho kigomba gukorera inyungu z’ikiremwamuntu no guteza imbere imibereho myiza yacyo.
Bityo rero, iyi Kongere itanga amahirwe yo kurushaho kuzirikana ku nyigisho za Nyirubutungane Papa no gushakisha uburyo Kiliziya n’abantu bose bafite umutima mwiza bashobora gukoresha neza kandi mu buryo buboneye ubwenge buhangano (“Artificial Intelligence”) n’irindi koranabuhanga rigezweho, batabangamiye agaciro k’umuntu cyangwa indangagaciro za gikristu.
Kubera ko ari Kongere mpuzamahanga ya mbere ya SIGNIS ibereye muri AFURIKA, Cardinal KAMBANDA yavuze ko iyi nama inatanga umwanya kugira ngo uyu mugabane usangize isi ubunararibonye bwawo mu guteza imbere itangazamakuru Gatolika rikozwe kinyamwuga ndetse guhangana n’ikoreshwa nabi ry’itangazamakuru risanzwe n’imbuga nkoranyambaga bikwirakwiza amacakubiri, urwango, n’ibinyoma.
Yatanze urugero rw’uko u RWANDA rwakuye amasomo akomeye mu mateka ababaje ya genocide yakorewe Abatutsi mu mwaka 1994.
Avuga ko birabaje kuba ibitangazamakuru byarakoreshejwe nabi mu gukaza amacakubiri n’iterabwoba, bikagira uruhare mu koroshya ishyirwa mu bikorwa rya genocide, kugeza n’ubwo ibitangazamakuru ubwabyo byabaye nk’abafatanyacyaha.
Kuva icyo gihe, ibitangazamakuru byabaye ibikoresho by’ubumwe, ubwiyunge, n’amahoro. Kubera amasomo yavanywe muri ayo mateka, ubu akoreshwa mu itangazamakuru mu gukiza ibikomere no gusana ibyangijwe, hatezwa imbere ubumwe, ubwiyunge, n’amahoro.
SIGNIS ni ihuriro rihuza abakora mu rwego rw’ itangazamakuru n’itumanaho rya Kiliziya.
Izi nzego, ni uguhera: ku rwego rw’igihugu, inzego zihuza akarere k’ubutumwa mu rwego rw’abepiskopi, bikagera ku rwego rw’umugabane, ndetse no ku rwego rw’isi.
Abagize izi nzego ku isonga haza abayobozi bakuru mu nzego zishinzwe itumanaho rya Kiliziya.
Ku rwego rw’isi, guhera i Vatican harimo abayobozi mu rwego rushinzwe itangazamakuru n’itumanaho rya Kiliziya, ukamanuka kugera ku nzego za Kiliziya zindi z’ama diyosezi.
Uretse izi nzego z’itumanaho zigize ubutumwa muri Kiliziya, hiyongeraho n’ibitangazamakuru ubwabyo, aho nko mu RWANDA hari: Pacis TV, Radio Mariya RWANDA, Radio Maria KIBEHO, na KINYAMATEKA.
Ikindi kiciro kigizwe n’inararibonye ziri muri za kaminuza. Aho usanga uko Kiliziya iba yashyizeho itangazamakuru, ariko ikanashyiraho za kaminuza ziryigisha itangazamakuru ry’umwuga. Hano mu RWANDA twvugamo nka kaminuza Gatolika ya KABGAYI, iherereye muri Diyosezi ya KABGAYI, ifite ishami ry’itangazamakuru n’itumanaho.
Aha muri za kaminuza hakaba habarizwamo abashakashatsi, abarimu bakora muri uru rwego rw’itangazamakuru n’itumanaho, n’abatera inkunga urwego rw’itangazamakuru n’itumanaho rya Kiliziya.
Nyuma ya saa sita, ku isaha ya 18h00’ nibwo Arkiyepiskopi wa KIGALI, Nyiricyubahiro Antoine Cardinal KAMBANDA, yayoboye igitambo cy’Ukaristiya cyo gufungura ku mugaragaro iyi Kongere mpuzamahanga ya “SIGNIS WORLD CONGRESS 2026”.
Umwanditsi: Adelphine UWONKUNDA.
