Nyiricyubahiro Antoine Cardinal KAMBANDA, Arkiyepiskopi wa KIGALI, mu gitambo cy’Ukaristiya yahaturiye, kuri iki cyumweru tariki ya 16/11/2025, yifatanyije n’abagororwa bagororerwa mu igororero rya NYARUGENGE (MAGERAGERE), riherereye muri Paruwasi ya BUTAMWA, ho muri Arkidiyosezi ya KIGALI guhimbaza umunsi mpuzamahanga w’abakene ku ncuro ya 9, anatanga Isakramentu ry’Ugukomezwa ku bagororwa 31 babiteguriwe.
Arkiyepiskopi wa KIGALI, Nyiricyubahiro Antoine Cardinal KAMBANDA, mu butumwa yahatangiye yavuze ko bumwe mu butumwa bwa Kiliziya ari ukugerageza kugera ku mutima. Bityo, yabibukije ko mu mutima w’umuntu haba hari amajwi abiri: Rimwe rimushishikariza gukora ikiza, irindi rikamubwira guhitamo ikibi. Ababwira ko mu byo bakora byose bakwiyekujya bashishoza mbere yo kugira icyo bavuga, icyemezo bafata,kuko ijwi ribasaba guhitamo ikiza ari iry’Imana, naho iribasaba gukora ikibi ari irya sekibi.
“Ubutumwa bwacu hano ni ubutumwa tuba tugerageza kugera ku mutima. Umunyarwanda aravuga ati kami ka muntu ni umutima we. Mbere y’uko igira icyo gukora, mbere y’uko ugira icyemezo ufata, mbere y’uko ugira icyo uvuga, hari wa mutima ukubwira uti iki ni kibi kireke.
N’ubwo ari cyo kikureshya, n’ubwo ufite umujinya, ushavuye ifate iki ni kibi kireke, hakaba n’undi mutima ukubwira uti gikore ntacyo bitwaye, cyangwa se batagira ngo uri imbwa ni ukugusuzugura , wa mutima ugukurura ku kibi uwo ni sekibi. Ijwi rikubwira riti iki ni kibi kireke ni Roho Mutagatifu”.
Nyiricyubahiro Antoine Cardinal KAMBANDA, yongeyeho ko Roho Mutagatifu bahawe mu isakramentu ry’ugukomezwa ari rya jwi ry’umutima nama, rya jwi ryiza ribwiriza umuntu gukora ikiza. Bityo ko aha ari ho Kiliziya ishimangira.
”Roho Mutagatifu mwahawe, Roho Mutagatifu utuyobora ni rya jwi mu mutima nama ukubwira uti iki ni kibi kireke, aho ngaho niho rero dushimangira, ni naho tuba twifuza kugera, kugira ngo mu butumwa bwa hano mu igororero natwe nka Kiliziya dushyireho akacu, kugira ngo mushobore kugororokera Imana, kugororokera abantu, no kugororokera igihugu, kuko iyo umuntu ari hano twese biratubabaza, imiryango yanyu, inshuti, abavandimwe, igihugu, Kiliziya, twese. Tukaba rero twese tuba tubifuriza ko mwagororoka”.
Kuri uyu munsi, Nyiricyubahiro Antoine Cardinal KAMBANDA yagaragarijwe bimwe mu byifuzo bafite, kugira ngo barusheho gutera imbere mu byiza no gukoresha neza impano bafite. Bamugaragarije ko bifuza ko bafashwa gukomeza gushyigikira urubyiruko mu bijyanye n’imikino n’imyidagaduro, kwiga gusoma no kwandika, kongerera imbaraga ishuri rya muzika mu bikoresho rikeneye (Inanga, gitari, ibitabo bya muzika, amacaki, n’ibindi), hari kandi bamwe mubagororwa bamaze igihe kirekire bategereje imbabazi ku masakramentu bafungiwe bakaba bategereje igisubizo.
Ku ruhande rwa Kiliziya, basabye kandi Komiseri mukuru w’igororero ubufatanye bakajya bemererwa kwitabaza abandi bapadiri bakaza kubafasha gutanga Penetensiya mu gihe cya Adventi mu kwezi k’ukuboza, ndetse no mu gihe cy’igisibo mu kwezi kwa Werurwe, kubera ko iyi gahunda ikenera umubare munini w’abapadiri.
Nyiricyubahiro Antoine Cardinal KAMBANDA, yibukije abagororwa ko Imana yabahaye impano zinyuranye, agaragaza ko yabonye bafite Korali nziza, ifite amajwi meza na muzika, abasimra n’impano bamuhaye. AYavuze ko izo mpano zose yabonye bifitemo, nk’aba-Artiste, ubuhanga bunyuranye bifitemo, agaragaza ko izo mpano, ayo maboko, imbaraga, ubuzima nyirizina Imana iba yarabubahereye kubikoresha neza, kubikoresha neza bakayihesha ikuzo, zikagirira abandi akamaro, bakubaka igihugu, bagahesha ishema Kiliziya umuryango babatijwemo, avuga ko biba bibabae Iyo zkoreshejw nabi.
Yavuze ko ku bw’iyo mpamvu Kiliziya ibabajwe kandi ishishikajwe no kugira ngo bashobore kubohoka no kugororwa, bityo izi mpano nziza nyinshi bifitemo zishobore guseruka, kuko zikenewe mu gihugu.
Yashimiye ubuyobozi bwa leta baba babemereye guhura nabo nk’uku, n’ubundi butumwa bakora mu bindi bihe, no kubona uko baha abagororwa amasakramentu.
Yabijeje ko ibyo bamusabye bizagenda birebwaho buhoro buhoro, yavuze ko abasaserdoti bahakorera ubutumwa bazagenda babaherekeza, kugira ngo babashe kubona imbabazi z’amasakramentu bakeneye, cyane cyane ko na Kiliziya iri mu mwaka wa Yubile, umwaka w’Impuhwe z’Imana.
Ibindi basabye nabyo yavuze ko ari ibintu bifasha no mu igorora, bityo impano bafite muri muzika, imikono, ko buhorobuhoro nabyo bazagenda babigezwaho, kuko bifasha no mu gutuma abantu batekereza neza, ibitekerezo bibi bikayoyoka.
Arkiypiskopi, yaboneyeho no kubibutsa gahunda iteganyijwe y’isozwa rya Yubile y’impurirane, na Yubile ya Arkidiyosezi ya KIGALI iteganyijwe kuzizihizwa mu mwaka utaha wa 2026, abifuriza kandi no kuzakomeza kugira umwaka mwiza wa Yubile. Aba bagororwa ni na bo babaye abambere yifurije kuzagira Noheli nziza n’umwaka mushya muhire wa 2026.
Kuri uyu munsi mpuzamahanga w’abakene, yanabagejejeho ubutumwa Nyirubutungane Papa Léon XIV yageneye mu guimbaa uyu munsi, bufite insanganyamatsiko igira iti “NI WOWE MIZERO YANJYE NYAGASANI”, Zab 71, 5.
Abo yahaye amasakramentu yanabahaye Igitabo cy’umukristu n’ishapule.
Arkiyepiskopi wa KIGALI, Nyiricyubahiro Antoine Cardinal KAMBANDA, akigera ku igororero rya NYARUGENGE yakiriwe na Komiseri mukuru wungirije w’urwego rushinzwe igororero (RCS), akaba yari Intumwa ya Komiseri mukuru DCG Rose MUHISONI.
Igororero rya NYARUGENGE ryifitemo Santrali yitiriwe Mutagatifu Tereza w’Umwana Yezu. Iri kandi, rigororerwamo abagororwa 10 750, barimo: Abagore 1324 n’abagabo 9426. Ryatangiye 1930, nyuma yaho ryimukira mu murenge wa MAGERAGERE mu mwaka 2017 aho riherereye kuri ubu. Rifite abagororwa bimuwe baturutse mu igororero rya KIMIRONKO na NYARUGENGE aho ryahoze. Rigororerwamo abaturtse hirya no hino mu gihugu, Abarundi, Abahinde, Abashinwa, Akakongomani, n’abandi bakoze ibyaha bari mu RWANDA, cyangwa se bakaba barabikoze ari ubufatanyacyaha n’abanyamahanga bari mu RWANDA.
