Mu gitambo cy’Ukaristiya yahaturiye, kuri iki cyumweru tariki ya 25/01/2026, Arkiyepiskopi wa KIGALI, Nyiricyubahiro Antoine Cardinal KAMBANDA, yifatanyije n’abakristu ba Paruwasi yaragijwe Bikira Mariya Umwamikazi wa Rozari / MUGOTE, iherereye muri Arkidiyosezi ya KIGALI, kwizihiza icyumweru cyahariwe Kuzirikana Ijambo ry’Imana, ukaba ari umunsi mukuru wahuriranye no gusoza icyumweru cyo gusabira ubumwe bw’Abakristu, ndetse no kwizihiza umunsi mukuru w’ihinduka rya Pawulo Mutagatifu Intumwa.
Iyi minsi mikuru yanahimbajwe no hirya no hino mu ma Paruwasi yose agize Arkidiyosezi ya KIGALI.
Ni ibirori byitabiriwe n’abandi Basaserdoti banyuranye, abiyeguriye Imana banyuranye, n’imbaga y’abakristu ba Paruwasi ya MUGOTE ndetse n’aba Paruwasi ya GITABAGE.
Mu gitambo cy’Ukaristiya, Arkiyepiskopi yahaye ubutumwa abasomyi b’Ijambo ry’Imana 81: Barimo 61 ba Paruwasi yaragijwe Bikira Mariya Umwamikazi wa Rozari / MUGOTE n’aba Paruwasi yaragijwe Bikira Mariya Dukesha Amizero / GITABAGE bagera kuri 20.
Nyiricyubahiro Antoine Cardinal KAMBANDA, Arkiyepiskopi wa KIGALI, mu butumwe yahatangiye, yavuze ko iki cyumweru cy’Ijambo ry’Imana ari uburyo bwo kurushaho kuzirikana uruhare Ijambo ry’Imana rifite mu buzima bwa muntu.
” Kuri iki cyumweru cy’Ijambo ry’Imana ni uburyo bwo kurushaho kuzirikana uruhare Ijambo ry’Imana rifite mu buzima bwacu, Ijambo ry’Imana ritumurikira tukabona ko turi abavandimwe, ritumurikira mu buzima bwacu rikaba ari naryo shingiro rero ry’ubumwe bw’abakristu”.
Arikiyepiskopi yavuze ko ari mahire ko iki cyumweru gihuye n’ihinduka rya Pawulo. Pawulo yabonye ijambo ry’Imana mu rumuri arahinduka. Igihe yari mu mwijima ahuye n’urumuri rwa Kristu, Pawulo wari warize ibyanditswe Bitagatifu, ari umuhanga wabyo, ariko akaba yari yarahushije, kuko yabyumvaga ukundi. Nyuma, abonye urumuri rwa kristu noneho ruramumurikira, mu gusoma rya Jambo ry’Imana nibwo yavumbuye ukuri k’urukundo rwa Kristu nibwo ubwe yavugaga ati “Kuba narahuye na kristu byatumye ibyo nahaga agaciro byose nasanze nta gaciro bifite ugereranyije no kumenya urukundo rwa Kristu”.
Avuga ko uyu ari we mukristu wamurikiwe na Kristu, akabona byose mu rumuri rwa Kristu, akabona abavandimwe nk’uko Imana ibabona, akabakira nk’uko Imana ibakira, akabakunda nk’uko Imana ibakunda.
Yavuze kandi ko, Ijambo ry’Imana ari naryo Jambo ry’Imana mu gitambo cy’Ukaristiya, ndetse rikaba ari n’ Ijambo rirema, bityo ko rifite agaciro gakomeye cyane, ko abantu bakwiye kuriha agaciro gakomeye.
“Ijambo ry’Imana ni naryo Jambo ry’Imana mu gitambo cy’Ukaristiya Yezu agira ati “Iki ni umubiri wanjye, iki ni amaraso yanjye. Rikaba ari Ijambo irema. Uretse ibi kandi, Bikira Mariya i KIBEHO yahishuye ikintu gikomeye, bikaba ari amahirwe n’umugisha abakristu bafite. Abana yabonekeye bamubajije bati “Ese turabwira abantu ko uri nde? Yaravuze ati ndi Nyina wa Jambo. Ndi Nyina w’Umuremyi, Jambo wigize umuntu, ndi Nyina wa Yezu Kristu. Murumva rero ijambo ry’Imana icyo ari cyo, duhereye no mu muco wacu ijambo rifite agaciro. Ni cyo twizihiza rero kuri iki cyumweru, dushimira cyane Nyirubutungane Papa Francisco umurage yadusigiye, kugira tujye duha agaciro Ijamabo ry’Imana”.
Yakomeje avuga ko iri jambo ry’Imana ryageze no mu RWANDA ndetse ko hashize imyaka 125 rihageze, nk’uko umwaka ushize Kiliziya mu RWANDA yabyizihizaga umwaka ushize. Iri jambo ry’Imana rikaba ryarahishuriye abantu ko Imana ibakunda. Ijambo ry’Imana ni urukundo, ni ijambo ry’urukundo, Imana yabahishuriye, bityo bigatuma babona ko ari abavandimwe hagati yabo.
Arkiyepiskopi, agaruka ku bumwe bw’abakristu yasobanuye ko mu ntangiriro hagati y’abigishwa hagiye habaho utuntu tw’amacakubiri nk’uko Pawulo Mutagatifu na we yagiye ubwe abyihamiriza azenguruka abyigisha, ko Kristu ari umwe, ariko mu mateka hagenda haza bamwe bagiye bagira ukutumvikana n’ubuyobozi bwa Kiliziya bagashinga idini ryabo. Ari byo hagiye bituma havuka amadini anyuranye, rimwe na rimwe akaba avutse ku nyungu zabo cyangwa se ku nyungu za politike. Ibi bikaba bigenda bigararagara muri ibi bihe, aho hagenda havuka amadini anyuranye, aho umuntu ashwana n’ubuyobozi bw’idini yari arimo, agahita ajya gushinga irye. Ibi bikaba ariyo mpamvu hashize igihe kinini hashyizweho iki cyumweru cyo gusaba ubumwe bw’abakristu, kuko Kristu yabasabiye agira ati “Ndabasabira kugira ngo bose babe umwe, kugira ngo isi yemere”.
Cardinal KAMBANDA, yakomeje asobanura ko iyo habayeho uku kudashyira hamzwe, kutunga ubumwe muri Yezu Kristu bitumwa abakristu na bo batemerwa. “Baravuga bati abakristu se ko mbona baryana, ko mbona bacitsemo ibice, Kristu twakemera ni uwuhe? Ibyo rero byagiye bitubya iyogezabutumwa, ari byo rero hashize igihe iri sengesho, aho ndetse ubundi iyo twariteguye atari mu gitambo cy’Ukaristiya nk’uku, dufatanya n’abavandimwe b’abandi madini, amadini ya gikristu Abaporoso, kugira ngo dusabire hamwe ubumwe bw’abakristu, nk’uko kristu yaturaze ubwo bumwe”.
Intego yo guhimbaza iki cyumweru ni “Ukwibutsa abayoboke b’Imana bose, abashumba n’intama agaciro n’icyubahiro bigomba guhabwa Ibyanditswe Bitagatifu mu buzima bwa gikristu n’isano iri hagati y’ijambo ry’Imana na liturujiya Ntagatifu”.
Ni icyumweru gifite uruhare mugufasha abakristu kumva no kuzirikana ku bukungu budakama buturuka mu mushyikirano w’Imana n’umuryango wayo. Ni umwanya kandi wo kuzirikana ku gaciro k’ubutumwa bwo gutangaza Ijambo ry’Imana mu ikoraniro, haba ku basomyi cyangwa se ku bayobora umuhimbazo.
Icyumweru cyahariwe kuzirikana Ijambo ry’Imana cyashyizweho na Nyirubutungane Papa Fransisko abinyujije mu rwandiko yatangaje kuwa 30 Nzeri 2019, yise “AHUGURA UBWENGE BWABO” (“Aperuit illis”), Nyirubutungane Papa yatangaje ko icyumweru cya 3 mu byumweru bisanzwe by’umwaka wa Liturijiya kizajya giharirwa kuzirikana Ijambo ry’Imana. Muri iyi nyandiko ye, Papa agaragaza ubukungu n’ubuzima Ijambo ry’Imana ryifitemo.
Papa ashishikariza abakristu kwimenyereza no gukunda Ijambo ry’Imana, agira ati “TUGIRANE UMUBANO WIMBITSE N’IMANA NDETSE N’ABAVANDIMWE BACU” (“Vivre en profondeur notre relation avec Dieu et avec nos frères”).
