Arkiyepiskopi wa KIGALI, Nyiricyubahiro Antoine Cardinal KAMBANDA, kuri uyu wa gatanu tariki ya 06/11/2026, yatangije ku mugaragara ihuriro ry’ingo (Forum), ku rwego rwa Arkidiyosezi ya KIGALI, riri kubera muri Paruwasi yaragijwe Bikira Mariya Umwamikazi w’Intumwa / NYAMATA kuva tariki 06 – 08/2026, yitabiriwe n’abasaga 500,
Umuryango (ingo)ugizwe: abagabo n’abagore (Couples), abapfakazi, abasaserdoti, abiyeguriye Imana, n’urubyiruko.
Mu butumwa bwe, Nyiricyubahiro Antoine Cardinal KAMBANDA yavuze ko umuryango ari wo Kiliziya umuryango w’Imana, Arkidiyosezi ya KIGALI yubakiyeho muri iyi myaka kugeza kuri uyu munsi.
“Tukaba dushimira Imana muri uyu mwaka wa Yubile, kuko umuryango ari wo Kiliziya umuryango w’Imana, Arkidiyosezi ya KIGALI, umuryango w’imiryango yubakiyeho muri iyi myaka, zubatse uyu muryango w’Imana muri Arkidiyosezi ya KIGALI kugeza kuri uyu munsi. Tukaba rero muri iyi minsi ya Yubile ari byo dushimira Imana. Wa muryango nanone ari wo uduha abiyeguriye Imana n’basaserdoti. Ni nka Anna watuye umwana Samuel Imana yari imaze kumuha, avuga ati “mushimiye Imana, kandi mutuye Imana. Samuel agakura aharanira gukorera Imana mu ngoro yayo”.
Yongeyeho kandi ko ingo nziza ari zo zitegura ingo nziza z’ejo hazaza, zikaba zinafite umuhamagaro n’ubutumwa bwo kwamamaza inkuru nziza.
“Ingo nziza kandi, ni na zo zitegura ingo nziza z’ejo. Umusore yubaka urugo afite ishusho ya se nk’umugabo mu rugo. Umukobwa yubaka urugo afite ishusho ya Mama we uko umugore mu rugo yitwara, uko abigenza, uko akora. Ni mpamvu rero umuryango, urugo rudufatiye runini, kandi urwo rug oni narwo rukora ubutumwa. Urugo ubwarwo uko ruteye rufite umuhamagaro n’ubutumwa bwo kwamamaza inkuru nziza, no mu iyogezabutumwa kudufasha”.
Yaboneyeho gushimira ingo za Betaniya zakira abana bikanabategurira amasakramentu. Bikaba ari urugero rw’ubutumwa bw’ingo. Yashimiye kandi ingo zifasha izindi ngo, aho muri ibi bihe hari ibibazo binyuranye by’ingo birimo amakimbirane mu ngo, aho iyo hari impaka n’amakimbirane bisaba izindi ngo kubafasha kubikemura, bakabagaragariza uko umugabo ahemukira umugore n’uko umugore ahemukira umugabo, ndetse n’uko bombi bahemukira abana, bikabakururira uburara n’ubwomanzi, gutwara ingo zitateganyijwe, kuko abana bakenera ko ababyeyi baba babanye mu Rukundo, kuko ari imbuto z’urukundo. Ku buryo iyo rwa Rukundo iyo rusenyutse umwana biramukomeretsa cyane.
Arkiyepiskopi yanabifurije kugira umwiherero mwiza, ashimira abasaserdoti bose baje kwiftanya nabo muri iyi forum, avuga ko bigaragaza agaciro k’umuryango.
Yaboneyeho kandi kubatura isengesho rya Nyibutungane Papa Francisco, mu ibaruwa ye ya gitumwa yandikiye umuryango “IBYISHIMO BY’URUKUNDO MU MURYANGO”, asaba ko ingo ingo zose zagitunga cyane cyane ko cyanashyizwe mu Kinyarwanda, kuko gikubiyemo inyigisho nyinshi n’inama nyinshi
Iyi forum, ibimburira Yubile y’umuryango ku rwego rwa Arkidiyosezi ya KIGALI iteganyijwe kuzizihizwa ku cyumweru tariki ya 08/11/2026. Ni mu rwego rwo kwizihiza Yubile y’imyaka 50 Arkidiyosezi ya KIGALI imaze ishinzwe, iri kwizihizwa muri uyu mwaka mu byiciro binyuranye.
Insanganyamatsiko ya Yubile igira iti “URUGO IGICUMBI CY’IYOGEZABUTUMWA N’AMIZERO YA KILIZIYA”.
