Umuryango Italia Solidale, kuri uyu wa gatandatu tariki ya 21/03/2026, wizihije Yubile y’imyaka 25 umaze ushinzwe, ukorera mu matsinda y’isangirabuzima muri Arkidiyosezi ya KIGALI, mu birori byabereye muri Sant’Egidio, muri Paruwasi ya Sainte Famille, ho muri Arkidiyosezi ya KIGALI. Ibi birori byabimburiwe n’igitambo cy’Ukaristiya cyatuwe na Padiri Donatien TWIZEYUMUREMYI, umuyobozi wa CARITAS KIGALI na Komisiyo y’Ubutabera n’amahoro muri Arkidiyosezi ya KIGALI, akaba n’intunwa ya Arkiyepiskopi muri uyu muryango.
Ibi, birori byitabiriwe na Davide de Maria Prezida (“President”) wa Italia Solidale ku isi, Sylvia Neposteri, Uhagarariye uyu muryango muri AFURIKA (“Responsable muri Afurika”), Donato Leone ushinzwe uyu muryango mu RWANDA (“Responsable mu RWANDA”), bose bakomoka mu gihugu cy’UBUTALIYANI, na Padiri Stiven, ushinzwe ubuzima bwa Roho mu muryango, ukomoka mu gihugu cya KENYA.
Umuryango Italia Solidale waje mu RWANDA mu y’ikubitiro yatabaye abari barashegeshwe bikomeye n’ingaruka za jenoside yakorewe Abatutsi mu 1994, uhagera mu 1997, bigizwemo uruhare na Arkiyepiskopi wa KIGALI, Nyiricyubahiro Antoine Cardinal KAMBANDA, wigaga i ROMA icyo gihe, utangira ku mugaragaro mu mwaka 2000. Mu myaka ya mbere hakozwe ubutabazi bw’ibanze bwakorewe ingo, hafashwa abana bazo batabarika kugira ngo babashe kwiga, nazo zigafashwa kwikura mu bukene bukabije zarimo.
Umuryango Italia Solidale washinzwe na Padiri Angelo Benolli ukomoka i Nago mu BUTALIYANI. Kugeza ubu, aho umuryango Italia Solidale wabaye hose kandi, wanafashije cyane abantu, ingo n’imiryango yahungabanyijwe cyane n’umuco w’urupfu uriho ubu wo gutwarwa n’ibintu, ugasanga abantu barabuze icyerekezo cy’ubuzima, maze ubafasha kongera kubona icyerekezo cy’ubuzima bwabo.
Padiri Angelo Benolli yavukiye i Nago mu BUTALIYANI mu mwaka 1931. Yari umupadiri kuva 1959 wiyeguriye Bikira Mariya.
Padiri Angelo Benolli yari yarize aba umuvuzi w’indwara zo mu mutwe (psychotérapeute), agatega amatwi umunsi ku wundi abantu batandukanye babaga batsikamiwe n’ibibazo, akababonera ibisubizo bifatika: ingo zatandukanaga, urubyiruko rwahindukaga ibirara, Gukwirakwiza imico yimakaza urupfu (culture de la mort), n’ibindi, yiyumvamo ko ari ngomba kubaha ubuzima; ni bwo agaragaje umurongo n’uburyo bushya bwita ku muntu, buhuza ukwemera n’ubuhanga bwa siyansi, kuva ubwo atangiza umuco mushya w’ubuzima n’ubutumwa.
Hano RWANDA, by’umwihariko muri Arkidiyosezi ya KIGALI, umuryango waje mu y’ikubitiro yatabaye abari barashegeshwe bikomeye n’ingaruka za jenoside yakorewe Abatutsi yari ikimara guhagarikwa mu mwaka wa 1994, maze wo uhagera mu 1997. Arkiyepiskopi wa KIGALI Antoine Cardinal KAMBANDA icyo gihe wigaga i ROMA ni we mu by’ukuri wabigizemo uruhare rukomeye. Mu myaka ya mbere urebye hakozwe ubutabazi bw’ibanze bwakorewe ingo hafashwa abana bazo batabarika ngo babashe kwiga, nazo zigafashwa kwikura mu bukene bukabije zarimo.
Gukora nyabyo nk’umuryango ufasha abawurimo kwifasha babanje kwibonera ubwabo aho bagwaga, ubwiyandarike n’ubutsikamirwe byabuzaga ubushobozi bifitemo kwigaragaza maze bagafata icyemezo kidakuka cyo gutangira urugendo rwo kubisohokamo bamurikiwe n’ijambo ry’Imana, n’inyigisho za Padiri Angelo byatangiye mu mwaka wa 2000.
Icyababaje ariko ni uko mu gihe gito amatsinda yo muri Arkidiyosezi yahise ahura n’ibibazo ariko bakaba bashimira Imana ko byageze aho bigacyemuka.
Mu mwaka wa 2010 Padiri Angelo Benolli ubwe yiyiziye mu RWANDA aherekejwe n’abafasha be ba hafi, asura amatsinda, ahugura abari mu rugendo maze asiga abateje intambwe.
kuri ubu bakaba bazihiza iyi Yubile y’imyaka 25 bashimira Imana intambwe ikomeje guteza imbere uyu muryango wa Italia Solidale.
Kuri uyu munsi uyu muryango wanashyikirijwe urumuri rwa Yubile y’imyaka 50 ya Arkidiyosezi ya KIGALI.
Muri Arkidiyosezi ya KIGALI uyu muryango ubarizwamo, imiryango iri guherekezwa igizwe n’ingo 200, ziri muri Paruwasi 4: KACYIRU ifite ingo 50, SAINTE FAMILLE ifite ingo 100 na NYAMATA ifite ingo 50. Kugeza ubu hari ingo nkeya za Paruwasi ya GIHOGWE ziri kubarizwa muri Paruwasi ya NYAMATA, kuko zitaragira Zone.
Uko umuryango ugenda waguka, uhera ku mubare runaka w’ingo, izi ngo zaba 5 zigahita Zikora itsinda, zaba amatsinda nayo yaba 10 agakora ibyitwa Zone.
Izi ngo zifashwa mu buryo bunyuranye: Kuganirizwa, mu buryo bwa Roho, no mu buryo bufatika bw’inkunga bahabwa yo kwiteza imbere.
MU RWANDA, muri rusange Umuryango Italia Solidale uri muri Diyosezi 3: Diyosezi ya BUTARE (aho uri muri Paruwasi ya NYUMBA), Diyosezi ya BYUMBA (aho iri muri Paruwasi ya MUTETE na BUNGWE, no muri Arkidiyosezi ya KIGALI.
ku isi, uri mu gihugu cya ARGENTINE, COLOMBIA, BREZIL, n’UBUHINDE.
Muri AFURIKA: uri mu gihugu cya UGANDA, KENYA, SOUTH SUDAN, MADAGASCAR, RDC, na CENTRE AFRICA.
Arkiyepiskopi wa KIGALI, Antoine Cardinal KAMBANDA, yifuza ko ibikorwa biri mu muryango Italia Solidale byinjizwa no mu Komisiyo y’umuryango bakagirana ubufatanye, mu rwego rwo kubaka umuryango uhamye.
