Arkiyepiskopi wa KIGALI, Nyiricyubahiro Antoine Cardinal KAMBANDA, kuri uyu wa kabiri tariki ya 23/12/2025, yasangiye Noheli n’abana ba Arkidiyosezi ya KIGALI basaga 7000, mu birori byabereye ku Ngoro y’Impuhwe z’Imana i KABUGA, iherereye muri Paruwasi ya KABUGA.
Ibi, birori byizihijwe mu nsanganyamatsiko nshya izaherekeza umwaka mushya w’ubutumwa igira iti “UMURYANGO WACU, ISHURI RY’UKWEMERA: DUTOZWE INZIRA Y’UKWEMERA TUKIRI BATO TUZAKURA TUKIYIRIMO”.
Abana barebwa n’iyi gahunda ni abana kuva umwana agisamwa kugeza ku myaka 14 y’ubukure.
Nyiricyubahiro Antoine Cardinal KAMBANDA, Arkiyepiskopi wa KIGALI, mu butumwa yabagejejeho yavuze ko impamvu yo kwizihiza uyu munsi ari mu rwego rwo gushyira mu bikorwa ikifuza cya Yezu.
“Uyu munsi rero bana muri iyi minsi ya Noheli twashatse kugira ngo dukurikize iryo jambo rya Yezu n’urugero yaduhaye agira ati “Nimureke abana bansange”. Uyu munsi umwana Yezu watuvukiye, wabaye umwana nkamwe yatubwiye ati Nimureke abana bansange. Ni uko ng’uko rero Abasaserdoti, ababyeyi, abarezi, Abiyeguriye Imana, inshuti z’abana, zabazanye ngo muhure na Yezu, ngo twubahirize icyo Yezu yadusabye”.
Yavuze ko Noheli inafite umwihariko ko ari iy’abana. Ni umunsi hizihizwaho umwana Yezu wavukiye abantu, Yezu wabaye umwana nkabo, ko ari umunsi mukuru w’abana, akaba ari na yo mpamvu bishimiye kubagenera uyu munsi, kubagenera uyu mwanya, kugira ngo bishimane n’umwana Yezu wabavukiye, umukiza.
Arkiyepiskopi, yasabye abana kugira urukundo, kujya bashimira Imana mu byo ibaha byose, kuyisingiza, gukunda no kwifuriza bagenzi babo ibyiza, bakanabasabira kugira ngo Imana ibahe kugira ubuzima bwiza, gusabira ababyeyi babo, gukorera ibyiza ababyeyi no kubumvira, gufasha bagenzi babo b’abakene, gusura bagenzi babo igihe barwaye, kuko ari rwo rukundo,
Yasobanuye ko Yezu wabavukiye kuri Noheli yaje kwigisha abantu urukundo, bityo ko nabo ubutumwa bwabo bwa mbere ari ukugaragariza abanda urukundo, ko yaje kubigisha, yaje kubasaba no kubishyira mu bikorwa.
Yavuze kandi ko, abana nabo bafite ubutumwa, ko ubutumwa bwabo bwa mbere ari ukugaragariza bagenzi babo urukundo, kuba abahamya n’urukundo rw’Imana, kandi bahereye mu rugo, ku babyeyi.
Nyiricyubahiro Antoine Cardinal KAMBANDA, yasabye abana intumwa ku bandi.
“Kwa kwemera duhera mu rugo, tukemera Imana ko idukunda, natwe tukayikunda, kandi tugakunda bagenzi bacu. Ubutumwa bwanyu rero ni ukuba intumwa ku bandi ko Imana ibakunda. Mube intumwa ku bandi bana, mubabwira ko Yezu abakunda, kandi abifuriza kuzagira Noheli Nziza”.
Yagaragaje ko hari abana bakora ubutumwa ku babyeyi. Atanga urugero rw’uko hari nk’abana babona batarahabwa amasakramentu bakabaza ababyeyi babo impamvu, bagasanga ababyeyi bakeneye kugarukira Imana, aho usanga ababyeyi bajya bashishikazwa n’abana kugarukira Imana. Aha aboneraho no gusaba ababyeyi kujya babohora abana kugira ngo bashobore guhabwa amasakramentu. Yasabye abana gukora ibikorwa by’urukundo ku ishuri bafasha bagenzi babo bafite amikoro macye, kandi bagatoza bagenzi babo isengesho n’ukwemera.
Arkiyepiskopi yasangiye Noheli n’abana mu rwego rwo kubasogongeza ku byishimo bya Noheli, kubategura kugira ngo bakire umwana Yezu, umwana Yezu waje asanga abantu.
Ku munsi mukuru wa Noheli uba buri mwaka tariki ya 25/12 hizihizwa ivuka rya Yezu Kristu umwana w’Imana wavutse ku isi, akaba ari we amateka y’isi agenderaho. Kuva imyaka itangiye kubarwa kuva Yezu yavuka hashize imyaka 2025.
Ikindi gice cy’amateka kiri imbere ya Yezu, iyi myaka nayo ibarwa bahereye ku ivuka rya Yezu basubira inyuma.
Aha, Arkiyepiskopi yasobanuye ko Musa uzwi cyane muri Bibiliya Ntagatifu yabayeho imyaka 1527, mbere ya Yezu. Umwami Dawudi yabayeho imyaka 970 mbere ya Yezu. Ingoma y’Abaromani ari yo Yezu yavuyseho yatangiye imyaka 27 mbere ya Yezu, yambuka amateka irakomeza igira imyaka 476.
Kugeza ubu mu mateka bahera ku ivuka rya Yezu babara imyaka kugera kuri ba Dawudi na ba Musa, na ba Abraham. Kuva ku ivuka rya Yezu gukomeza muri iki gihe cya none, ubu hashize imyaka 2025. Iyi ikaba ari nayo mpamvu y’ibyishimo bya Yubile y’impurirane imaze iminsi yizihizwa muri Kiliziya, bikaba ari ibyishimo bikomeye muri Kiliziya: Yubile y’imyaka 2025 ishize Yezu Kristu yigize umuntu aje gucungura isi, ndetse n’imyaka 125 iyo nkuru ye nziza y’umukiro wa bene muntu igeze mu RWANDA. Bityo ko ubusanzwe iyo umwana avutse mu muryango biba ari impamvu y’ibyishimo mu muryango, mu baturanyi, n’ahandi.
Ibi birori byitabiriwe na Padiri mukuru wa Paruwasi ya KABUGA, Padiri Ildephonse, Padiri Joseph GWIZA, Padiri Alphonse NDAGIJIMANA, umuyobozi w’Ingoro y’Impuhwe z’Imana, ushinzwe Komisiyo ishinzwe Iyogezabutumwa ry’abana, Abiyeguriye Imana batandukanye, inshuri z’abana, n’abandi. Byitabiriwe kandi n’umuyobozi wungirije mu Kigo gishinzwe Imikurire y’Abana no kurengera Umwana, NCDA (National Child Development Agency), Gilbert MUNYEMANA, World Vision, SOSOMA, Save the Children, Save the Children, SOS, Hope and Homes for Children, Imbuto Foundation, Compassion International, n’abandi bafite aho bahuriye n’abana.
Bumwe mu butumwa abana bakora muri Arkidiyosezi ya KIGALI harimo: Kwitabira akagoroba k’abana, Patronage, Furumu z’abana, ingendo Nyobokamana zinyuranye, haba i KIBEHO ndetse n’ahandi.
Ku Ngoro y’Impuhwe z’Imana kandi, uretse igitambo cy’Ukaristiya baturiwe na Arkiyepiskopi, abana banasuye ibikorwa bitandukanye by’ahantu hakorerwa ingendo Nyobokamana biri kuri iyi Ngoro: Imva ya Yezu, ikirugu, n’ahandi.
Ibirori byo kwizihiza Noheri y’abana guhitamo aho bibera hakurikizwa akarere k’icyenurabushyo (“Zone Pastorale”), hakagenda hasimburana. Umwaka ushize uyu munsi wizihirijwe muri Paruwasi ya GAHANGA. Umwaka utaha uzizihirizwa muri Zone Pastorale ya NYAMATA.
