Twivugurure mu kwemera kandi twitangire iyogezabutumwa nka Petero na Pawulo

Uyu munsi  tariki ya 2/7/2023, muri Paruwasi ya Masaka,  Nyiricyubahiro  Antoine Karidinali  Kambanda,Arkiyepiskopi wa Kigali  yifatanyije n’abakristu, mu kwizihiza abatagatifu Petero na Pawulo baragijwe Paruwasi ya Masaka.  Mu gitambo cya misa kandi yahaye ubutumwa abagabuzi b’ingoboka  bagera kuri 80.  Mu rwego rwo kwitegura uyu munsi mukuru, abakristu ba Paruwasi ya Masaka bakoze noveni y’iminsi icyenda, bazirikana ingingo zinyuranye zirimo izi :

“Petero na Pawulo ni abahuza batangaje bacu n’Imana”, ” Petero na Pawulo ni abarobyi b’abantu, Petero na Pawulo ni intumwa zamamaje hose Inkuru Nziza n’ishyaka ryinshi, Petero na Pawulo nk’abarimu b’ubuzima nyakuri” , ” Petero na Pawulo ari ingero z’ubuzima bwa gikristu” , Petero na Pawulo ni abarinzi n’abavugizi ba Kiliziya ” ” Petero na Pawulo nk’abogezabutumwa batangaje”, ” Petero na Pawulo ni inkingi z’ubumwe n’ubwiyunge muri Kiliziya “, ” Petero na Pawulo n’ibihe turimo “.

Mu butumwa Umwepiskopi yatanze, yibukije abakristu ko muri Arkidiyosezi twatangiye urugendo rwo kwitegura  kuzahimbaza yubile y’imyaka 50 Arkidiyosezi imaze ishinzwe (1976-2026). Muri iki gihe abasaserdoti bazasura ingo z’abakristu zose. Yaboneyeho gusaba abakristu kuzakira abasaseridoti kuko ni umugisha bazaba bakiriye mu ngo zabo.  Umwepiskopi  kandi yahaye ubutumwa bwihariye urubyiruko, aho yibukije ko uyu mwaka , Kiliziya y’u Rwanda yawuhariye uburezi aho insanganyamatsiko yagiraga iti “umwana ushoboye kandi ushobotse.”  Urubyiruko rukwiye  guhabwa uburere bwiza  kandi bakaba abantu bafite imyitwarire myiza. Umwepiskopi  yashimiye ku buryo bwihariye  abihayimana bakorera ubutumwa muri Paruwasi Masaka  kubera umusanzu ukomeye batanga mu burezi ndetse no mu bundi butumwa bakora muri Paruwasi.

Arkiyepiskopi atura Igitambo cy’Ukaristiya
Abakristu ba Paruwasi Masaka bageneye Arkiyepiskopi impano y’ishusho ya Mutagatifu Petero na Pawulo
Arkiyepiskopi aha ubutumwa abagabuzi b’ingoboka
Ibirori

 

Padiri Umuhire Alain Robert

Paruwasi Masaka

Leave a Reply

Your email address will not be published. Required fields are marked *