Paruwasi Gikondo

Paruwasi Mutagatifu Visenti Pallotti ya Gikondo

Padri Mukuru,Padri Jean Pierre NSABIMANA

Nimero ya telefoni : 0788419225

Umunyamabanga: Alexandre NSANZABAGANWA

Nimero ya telefoni: 0789271436

GAHUNDA YA MISSA :

Ku cyumweru :

06h00, 10h00 & 12h00: Mu Kinyarwanda
08h00 : Mu Kiswahili
16h30 : Mu Gifaransa

Ku yindi minsi :

Missa ya mugitondo buri munsi itangira 06h30
Missa ya nimugoroba ku bantu bose itangira 18h00 kuwa gatatu kugeza kuwa gatanu
Missa y’urubyiruko nimugoroba buri wa kabiri w’icyumweru, itangira 18h00
Missa y’abarwayi nimugoroba kuwa mbere wa gatatu w’ukwezi,itangira 16h30 ;
Missa ya Neo-catechumenat kuwa Gatandatu nimugoroba, itangira 18h00

GUSHENGERERA

Kuwa kabiri kugeza kuwa kane nyuma ya Missa ya mugitondo

PENETENSIYA :

Kuwa kane nyuma ya Missa ya mugitondo

Tumenye Paruwasi ya Gikondo

Paruwasi ya Gikondo yahoze ari Santarali ya Paruwasi y’Umuryango Mutagatifu ari nayo yayibyaye. Yashinzwe mu mwaka w’1976. Ikora ku gice cy’imirenge ya Kigaramana na Gatenga, naho umurenge wa Gikondo wose uri mu mbibi zayo. Kiliziya ya Paruwasi iri mu Mudugudu wa Marembo, Akagari ka Kanserege, Umurenge wa Gikondo, Akarere ka Kicukiro.

Ihana imbibi na paruwasi Nyamirambo (amajyaruguru), Remera na Kicukiro (amajyepfo), Sainte Famille na Saint Michel (uburengerazuba), na paruwasi ya Kicukiro (uburasirazuba).

Amateka ya paruwasi

Paruwasi Mutagatifu Visenti Palloti ya Gikondo yizihiza umunsi mukuru wayo tariki 22 Mutarama.

Ishingwa nta santarali yagiraga. Yari ifite inama z’uturere zikurikira :

Butare
Kanserege
Karambo
Kigarama
Mburabuturo
Murambi

Gikondo iba paruwasi muri 1976, nta nyubako yayo bwite yari ifite, kuko yagiye ikorera hirya no hino. Babanje kujya bateranira mu ishuri rya Gikondo, icyo gihe ryari rigizwe n’akazu k’icyumba kimwe kubakishije amabuye, kuva hasi kugera hejuru, gasakaje amategura, aho Groupe Scolaire St Vincent Pallotti yubatse ubungubu.

Ikigo nderabuzima cya Gikondo kimaze kubakwa, abakristu bavuye ku ishuri rya Gikondo batangira kumvira misa ku Kigo Nderabuzima mu cyumba kimwe cy’inama. Ariko kubera ubuto bwacyo, abakristu bamwe bakayumvira hanze. Babifashijwemo n’Abapadiri b’Abapallotini Bari bamaze kugira inyubako batuyemo iri ahari urugo rwabo ubungubu, abakristu bemerewe kujya basengera mu kigo cya Mera, cyakoraga Radio Mera, bakumvirayo na misa.

Abo bapadiri bamaze kuzuza inyubako yabo ya mbere kuri paruwasi, yarimo n’icyurnba cyari kigenewe guteza imbere umuco /centre culturel, abakristu bavuye mu kigo cya MERA, batangira kumvira misa muri icyo cyumba ndangamuco. Aho niho bakomeje gusengera no kumvira misa, kugeza muri 1980, aribwo Kiliziya yatashywe ku mugaragaro nk’ingoro ya Paruwasi nshya ya Gikondo, yitirirwa Mutagatifu Visenti Pallotti, ihabwa umugisha n’Umushumba w’ Arkidiyosezi ya Kigali Musenyeri Visenti NSENGIYUMVA.

Santarali Mutagatifu Pallotti ya Gikondo.

Yahsinzwe tariki 21 Mutarama 2017 hatorwa komite izayiyobora.

Ifite Mpuza 18 n’imiryango remezo 112.

Santarali Mutagatifu Pawulo ya Murambi.

Igitekerezo cyo gutangiza iyi santarali cyavuye ku bakristu ubwabo, kubera abakristu benshi bavaga muri Kiliziya Gatolika bajya mu yandi madini, bagasobanura ko paruwasi iri kure yabo. Padiri Gasore yakiriye neza icyo cyifuzo mwa ka wa 2000. Yemerera abakristu kujya bakora imihimbazo abaha n’ibikoresho bakeneye. Umuhimbazo wa mbere wabereye munsi y’igiti cy’umunyinya, mu kibanza abakristu bari barahawe n’umurenge tariki 20/02/2000. Mu kwezi kwa Mata 2000, ku munsi wa Pasika, Misa ya mbere yasomewe i Murambi munsi y’igiti, habatizwa n’abana batatu.

Nyuma yaho, abakristu bunganiwe n’abo mu miryango ya Agisiyo Gatolika ya paruwasi batangiye kubaka shaperi ntoya ya metero 5 x 7. Ariko ikibanza bacyambuwe na Leta yari yakibahaye imirimo yo kubaka itararangira.

Abakristu ubwabo barisuganyije, bagura ikibanza cy’amafranga 50.000 FRW. Inyubako ya mbere bari batangiye imvura y’umuvumbi yarayishenye mu mwaka wa 2003, bakomeza gusengera munsi y’igiti. Padiri Antoine BALIGORA atangira kujya aturayo igitambo cya misa buri kwezi. Avanwa i Gikondo mu mwaka wa 2005, Kiliziya bari batangiye kubakwa yari igeze ku madirishya.

Padiri Chrysante RWASA aho aziye afasha abakristu gukomeza imirimo no kuyirangiza. Kiliziya yatashywe na Myr Tadeyo NTIHINYURWA tariki 05/07/2009. Santarali iragizwa Mutagatifu Pawulo. Ifite Mpuza 4 n’Imiryango Renmezo 17.