Isabukuru y’imyaka 104 Kiliziya Gatolika mu Rwanda ibonye abapadiri b’abenegihugu ba mbere: Balthazar GAFUKU na Donat REBERAHO

Nzabaha abashumba banogeye umutima wanjye, maze babaragirane ubushobozi n’ubwitonzi bwinshi(Yer 3,15): 7/10/1917-7/10/2021

Kuva mu ntangiriro, Kiliziya yagiye iyoborwa mu iyogezabutumwa n’ijambo Kristu yabwiye intumwa ze mbere yuko asubira mu Ijuru agira ati:”Nuko rero, nimugende mwigishe amahanga yose, mubabatize ku izina ry’Imana Data na Mwana na Roho Mutagatifu, mubatoze gukurikiza ibyo nabategetse byose. Dore kandi ndi kumwe namwe iminsi yose, kugeza igihe isi izashirira”(Mt 28,19-20).

Ni muri uwo mu rongo, mu mwaka 1900, mu Rwanda hageze bwa mbere intumwa y’Inkuru Nziza, intumwa y’amahoro nkuko umuhanuzi Izayi yabihanuye:” Mbega ngo biraba byiza kurabukwa mu mpinga y’imisozi, ibirenge by’intumwa izanye inkuru nziza, ivuga amahoro, igatangaza amahirwe, ikabwira Siyoni iti”Imana yawe iraganje”(Iz52,7). Iyo ntumwa nta yindi ni Musenyeri Jean Joseph HIRTH, waje aherekejwe n’abapadiri, abihayimana n’abakateshitse.

Musenyeri HIRTH, ntiyatinze yaje guhitamo abasore bagera mu icumu kugirango batangire guhabwa inyigisho zibategurira kuzahabwa ubupadiri. Muri abo basore harimo abo twibuka uyu munsi babaye abapadiri ba mbere b’abanyarwanda nyuma y’imyaka cumi n’irindwi gusa Inkuru Nziza igeze mu Rwanda. Abo ni Padiri Baithazar GAFUKU na Padiri Donat REBERAHO. Abo nibo babaye imfura muba padiri b’abanyarwanda ku itariki ya 7 ukwakira 1917. Ubu turahimbaza imyaka 104 ishize Kiliziya Gatolika mu Rwanda ibonye abapadiri babiri ba mbere b’abanyarwanda.

Incamake ku buzima bwa BALTHAZAR GAFUKU na Donat REBERAHO

Padiri Balthazar GAFUKU yavukiye i Zaza muri Diyosezi ya Kibungo mu mwaka 1885 ku ngoma y’umwami Kigeli IV RWABUGILI (+1895). Se yitwa KAMURAMA naho nyina yitwa NYIRAHABIMANA. Abamisiyoneri bageze mu Rwanda Balthazar GAFUKU afite hagati y’imyaka 16 na 18.

Padiri Donat REBERAHO we yavutse hagati y’umwaka 1894-1895 I Rubona-Save. Se yitwa Semihari naho nyina yitwa NYIRANDEKEYE. REBERAHO yabatijwe tariki ya 19 Nzeri 1903 ahabwa izina rya Donat.Umubyeyi we wa batisimu ni Alphonse MBONYIGABA. Mbere yo kwinjira mu iseminari nto, Donat REBERAHO yabaye umukateshitse n’umufasha w’abamisiyoneri.

Mu kwezi kwa Nyakanga 1904, Musenyeri Hirth yakiriye Gafuku Balthazar, Donat Reberaho n’abandi basore barimo Joseph BUGONDO na Pierre NDEGEYA mu iseminari ya Hangiro I Bukoba, yaje kwimurirwa i Kyanja-Rubia muri Tanzaniya (reba DIYOSEZI YA BUTARE, Imfura z’abapadiri b’abanyarwanda, Butare 2016,p.4). Iseminari nto bayize kuva mu 1904 kugeza mu 1909. Kuva 1909 kugeza mu 1910 bize Filozofiya. Naho kuva mu 1910 kugeza mu 1913 bize Tewolojiya. Balthazar GAFUKU yahawe ubudiyakoni m’Ukwakira 1916. Naho Donat REBERAHO ahabwa ubudiyakoni tariki ya 8 Ukwakira 1916. Abadiyakoni bombi baje guhabwa ubupadiri tariki ya 7 Ukwakira 1917, babuhabwa na Musenyeri HIRTH muri Katedrali ya Kabgayi. Balthazar GAFUKU yitabye Imana tariki ya 14 Kamena 1959 I saa tanu z’amanywa. Dore ugushaka kwanyuma kwa Padiri Balthazar GAFUKU nkuko tubisanga mu kinyamakuru cya Tewolojiya cy’abaseminari bakuru bo mu Nyakibanda muri numero y’I 148, urupapuro rw’I 109:

« Suscipe Domine universam libertatem. Accipe memoriam, intellectum, atque voluntatem omnem. Quidquid habeo vel possideo, mihi largitus es:id totum restituo ac tuae porsus voluntati trado gubernandum» (Prends Seigneur toute mon intelligence. Prends ma mémoire, mon intelligence et toute ma volonté. Tout ce que j’ai ou je possède, c’est Toi qui me l’as donné : tout cela, je te le restitue et je l’offre à ta volonté).
Ibyo nzaba mfite muri Economat Général bizategekwa na Monsegneur le Vicaire Apostolique, ni we uzamenya icyo bikwiye gukoreshwa.
Ibyo nzaba mfite mu misiyoni ndimo bizayigumamo bitegekwe na Padiri mukuru, bizakoreshwe ibyo gusukura Kiliziya.
« Amorem tui solum cum gratia tua mihi dones et dives sum satis nec aliquid ultra posco » : Niragije umubyeyi wanjye nkunda Bikira Mariya. Yezu Kristu nasingizwe iteka ryose.

Padiri Balthazar GAFUKU yitabye Imana ku myaka isaga 75, ashyingurwa i Mugombwa muri Diyosezi ya Butare. Ashyingurwa na Musenyeri André Perraudin.

Naho Donat REBERAHO we yitabye Imana tariki ya 1 Gicurasi 1926 ku myaka 41 y’amavuko.

Abo bakuru bacu turabashimira umuhate n’ubwitange bagaragaje mu iyogezabutumwa. Nubwo hashize imyaka myinshi nyamara turabasaba ngo badusabire kuri Nyagasani ngo yohereze abasaruzi mu murima we kuko imirima yeze ni myinshi ariko abasaruzi ni bake.

Twibutseko Kiliziya mu Rwanda yakomeje gukura ku buryo bwihuse kuko mu mwaka 1952 yabonye umwepiskopi wa mbere w’Umunyarwanda Musenyeri Aloys BIGIRUMWAMI Naho tariki ya 28 Ugushyingo 2020 Kiliziya mu Rwanda ibona umukaridinali wa mbere ariwe Antoine Cardinal KAMBANDA, Arkiyepiskopi wa Kigali.